Тошкент вилояти ҳокими Зоир Мирзаевнинг айтишича, ҳокимлар қабулида бўлиб моддий ёрдам ундиришни ўзига касб қилиб олган фуқаролар ҳам бор. Бу ҳақда ҳоким Оҳангарон туманида бўлиб ўтган сайёр қабулида маълум қилди.
Таъкидланишича, Тошкент вилояти ҳокими Зоир Мирзаевнинг навбатдаги сайёр қабули вилоятнинг Оҳангарон туманидаги Бешқўл қишлоғида бўлиб ўтган.
“Дарё” журналистининг аниқлаштиришича, сайёр қабулда вилоят ҳокими томонидан 130 нафар фуқаро муаммоси тингланиб, моддий ёрдам сўраб келганларнинг аксариятига маблағ ваъда қилинган.
“Моддий ёрдам олишни ўзига касб қилиб олганлар ҳам бор. Иккинчидан моддий ёрдам сўраб келган одамнинг кўзига қарасангиз, ҳақиқатдан ҳам муҳтожми йўқми биласиз, албатта. Пул сўралганда ‘сизга палон сўм берамиз’, деб тўғридан тўғри айтмаймиз, ёнимизда депутатлар турган бўлади, уларнинг хулосасини олиб, сўнгра сўралган ва ваъда қилинган пул берилади. Менинг қўлимдаги пул, мен ваъда қилаётган пул давлатимиз раҳбари берган пуллар. Ўша пул жойига етиб боришига масъул инсон сифатида мурожаатчиларнинг оғзига сиққан пул берилмаслигини, ҳақиқий муҳтожларга берилиб, адолатли сарфланишини назорат қиламиз. Ҳақиқий муҳтожларга пул берсак, фуқарога ҳам ёқади, шаффофлик ҳам бўлади. Яратганга ҳам ёқади”, — дейди вилоят раҳбари Зоир Мирзаев.
Тошкент вилояти ҳокими аввалроқ бир кунлик қабулида моддий ёрдамга муҳтожларга камида 350-400 миллион сўм маблағ сарфланишини айтиб, “Ҳокимият тизимида ишлаётганимга 22 йил бўлган бўлса, охирги олти йилдагидек қўлимда маблағ бўлмаган. Маблағ йўқлигида одамларнинг олдига боролмайсиз ҳам. Кўчамни таъмирлаб бер деса, ёки уйимни таъмирлаб берса, нима дейман, нима деб жавоб бераман деб истиҳола қилиб, қочиб юрган пайтларимиз ҳам бўлган. Буни тан олиш керак”, — деганди.
Изоҳ (0)