Toshkent viloyati hokimi Zoir Mirzayev prezident Shavkat Mirziyoyev viloyat hokimlari faoliyatini, ularning ijtimoiy tarmoqlardagi sahifalari-yu, internetda hokimlarning kamchiliklari hamda yutuqlari haqida diqqat bilan o‘qib borishini, bu haqda katta selektorlarda shaxsan prezidentning o‘zi gapirishini ma’lum qildi.
Prezidentimiz katta selektorlarda faoliyatimizni kuzatayotganliklarini aytadi. Barcha hokimlarni diqqat bilan kuzatib, kamchilik va yutuqlarimizni, yaxshi va yomon holatlar haqida, albatta, fikr bildiradi, — deydi Toshkent viloyati hokimi Zoir Mirzayev.
Toshkent hokimi “Daryo” jurnalistining “Onlayn efir orqali sayyor qabul o‘tkazish amaliyotingiz prezidentga qay darajada ma’qul keldi. Bu haqda prezidentning shaxsan o‘zlari fikr bildirdimi?”, — deya berilgan savolga ham javob berdi.
Onlayn efir borasida prezidentimiz katta selektorda fikr bildirib, kuzatishlarini aytgan, albatta. Nega aynan onlayn efir orqali xalq murojaatlarini o‘rganishimiz haqida to‘xtalsak, ko‘pchilik kuzatuvchilarimiz biladiki, nochor bo‘lmagan odam qabulga kelib moddiy yordam so‘raganida jonli efirning o‘zida buni rad qilganimizni ko‘rayotgan kuzatuvchilar izohlar orqali bizga yordam beradi. Ikkinchi tomoni biz shu onlayn efir orqali sayyor qabulda kimgadir topshiriq beryapmiz buni jamoatchilik eshitib turadi, shunda topshiriq oluvchi ham o‘zimiz ham bunga yanada mas’uliyat bilan yondashamiz. Jonli efir orqali qabulni kuzatib turgan to‘qqiz ming nafar inson oldida va’da bergan mas’ul buni bajaradimi-yo‘qmi xalq o‘zi baho berib boradi, — deydi viloyat rahbari Zoir Mirzayev.
Hokim onlayn efirdagi sayyor qabulini kuzatuvchilar orasida ham bu ishga ishonchsizlik bilan qarayotgan, buni piar uchun deb baholayotganlar ham borligini inkor etmadi.
Tan olish kerak qilayotgan ishlarimizga bu ko‘zbo‘yamachilik, piar uchun qilinayotgan ish deguvchilar ham topiladi. Buni ham doim ko‘ramiz va kuzatamiz. Izoh yozib, javob ham beramiz. Biz tanqidiy qarashlarga ham qarshi emasmiz, ammo tanqid ekan deya hatto o‘qishga uyaladigan so‘zlarni yozish musulmonchilikka ham to‘g‘ri kelmaydi, jurnalist etikasiga ham. Endi o‘sha so‘zni yozuvchining tarbiyasiga bog‘liq, albatta, — deydi hokim.
Toshkent hokimining ma’lumot berishicha, hokimning bir kunlik qabulida moddiy yordamga muhtojlarga kamida 350-400 million so‘m mablag‘ sarflanadi.
Hokimiyat tizimida ishlayotganimga 22 yil bo‘lgan bo‘lsa, oxirgi olti yildagidek qo‘limda mablag‘ bo‘lmagan. Mablag‘ yo‘qligida odamlarning oldiga borolmaysiz ham. Ko‘chamni ta’mirlab ber desa, yoki uyimni ta’mirlab bersa, nima deyman, nima deb javob beraman deb istihola qilib, qochib yurgan paytlarimiz ham bo‘lgan. Buni tan olish kerak, — deydi Toshkent viloyati hokimi.
Zoir Mirzayev jurnalistlar bilan muloqotida, shuningdek, faoliyati davomida ijtimoiy tarmoqlarda orqali berilayotgan savollarga va aholi izohlariga shaxsan o‘zi javob berishini, bu ish bilan asosan yo‘lda avtomobilda ketayotgan paytda, qolaversa, ishdan qaytgach uyda shug‘ullanishini bildirdi.
Mashinada u joydan bu joyga ketayotgan paytimda telefon orqali ijtimoiy tarmoqlarni diqqat bilan kuzatib, berilayotgan har bir savolga, e’tirozga shaxsan o‘zim javob berishga harakat qilaman. Qolaversa, ishdan keyin uyga qaytganimdan so‘ng ham kechasi 11 dan keyin bir-ikki soat ijtimoiy tarmoqlarni kuzatib, aholi tomonidan berilayotgan barcha savollarga javob beraman, — dedi Zoir Mirzayev.
Mavzuga doir:
- “Biz avval mahallabay, ko‘chabay va xonadonbay ishladik. Endi fuqarobay ishlashni boshladik” — Zoir Mirzayev
- “Hokimlarni yomon ko‘ruvchilarning bolasi hokim bo‘lsin”. Zoir Mirzayev fuqarolar uchun navbatdagi qabulida ayrim murojaatchilarga tanbeh berdi (video)
- Zoir Mirzayev qabulida bo‘lgan 88 yoshli otaxon sobiq hokim tomonidan yeri olib qo‘yilganini, biroq kompensatsiya berilmayotganini ma’lum qildi
- “Kuchukning uyini tillaga tenglashtirib yuboradiganlar bor” — Zoir Mirzayev
Izoh (0)