Ta‘mirlash ishlari tufayli Mirzo Ulug‘bek, Uchtepa va Shayxontohur tumanlarining ayrim joylarida elektr ta‘minoti vaqtincha to‘xtatildi. Bu haqda “Hududiy elektr tarmoqlari” AJ axborot xizmati xabar berdi.
Unga ko‘ra, isteʼmolchilarga sifatli va barqaror elektr energiyasi yetkazib berilishini taʼminlash, shuningdek, elektr tarmoqlarida sodir bo‘lishi mumkin bo‘lgan avariya holatlarining oldini olish hamda taʼmirlash ishlarini xavfsiz bajarish maqsadida bugun, 8-iyun kuni quyidagi manzillarda soat 16:00 dan 18:00 gacha elektr taʼminoti vaqtincha to‘xtatildi:
- Uchtepa tumanining “Sharq yulduzi” mahallasi Durbek, Durbek 4-tor hamda Lochin ko‘chalari hududida;
- Shayxontohur tumanining Bog‘ ko‘cha, Shayxontohur, Labzak, S.Xo‘jayev, Arxitektorlar va X.Asomov ko‘chalari hududida;
- Mirzo Ulug‘bek tumanining Parkent, Oltintepa va Bo‘z mahallalari hududida.
Mazkur taʼmirlash ishlari tufayli elektr energiyasi taʼminotidagi vaqtincha uzilishlar sababli yetkazilayotgan noqulayliklar uchun isteʼmolchilardan uzr so‘ralgan.
Shuningdek, maʼlum qilinishicha, “Qo‘qon” podstansiyasida 35 kilovatli yuqori kuchlanishli kabel tarmog‘ining shikastlanishi natijasida favqulodda avariya holatida elektr energiyasidan uzilish sodir bo‘lgan. Buning natijasida, Mirobod va Yakkasaroy tumanlari hududidagi isteʼmolchilarining bir qismida elektr taʼminotida uzilish kuzatilmoqda.
Ayni vaqtda “Hududiy elektr tarmoqlari” AJ Toshkent shahar filialining yuqori kuchlanishli avariyaviy holatlarni bartaraf etish maxsus tezkor brigadalari tomonidan podstansiyadagi nosozlikni bartaraf etish choralari ko‘rilmoqda.
Bundan tashqari, yuqori kuchlanishli elektr tarmog‘idagi nosozlik sabab bir necha nasos stansiyalari elektr ta’minotidan uzildi. Buning natijasida Yashnobod, Yakkasaroy, Mirobod tumanlaridagi bir qator aholi massivlari suvsiz qoldi.
“Hududiy elektr tarmoqlari”ning bildirishicha, hozirda podstansiyadagi nosozlikni bartaraf etish choralari ko‘rilmoqda. Olib borilgan tiklash ishlari natijasida Yakkasaroy tumanining ba’zi hududlarida elektr energiyasi qayta tiklangan. Tez fursatlarda qolgan hududlar ham elektr energiyasiga qayta ulanadi.
Avariyaviy holatni bartaraf etish ishlari tezkor brigada xodimlari hamda maxsus texnika yordamida uzluksiz olib borilmoqda.