Andijon viloyati Qorasuv shahrida Matiz haydovchisi Equinox’ga tesha bilan hujum qildi. Viloyat IIB axborot xizmati holat yuzasidan ma’lumot berdi. 

Unga ko‘ra, 14-may kuni soat 18:20 da fuqaro M.M. o‘zining boshqaruvidagi Matiz’da otasi bilan Qorasuv shahar hududida harakatlanib ketayotgan vaqtida ariza muallifi O.A. o‘zining boshqaruvida bo‘lgan Equinox’da ularning harakatlanishiga to‘sqinlik qilib, M.M.ning otasiga noo‘rin xatti-harakat qilgan. 

Shu sababli M.M. otasini uyiga tashlab, O.A.ning ortidan borib, otasiga nisbatan bo‘lgan hurmatsizlik yuzasidan o‘zaro gap tortishgan va videoda aks etgan holatlarni sodir qilgan.

Mazkur holat yuzasidan o‘tkazilgan tekshiruvlar davrida murojaatchi O.A.ning avtomashinasiga 7 016 542 so‘m miqdorda zarar keltirilgani, biroq ushbu holatda biror-bir shaxsga nisbatan tan jarohatlar yetkazilmagani aniqlangan.

Holat bo‘yicha o‘tkazilgan tergovga qadar tekshirish harakatlari yakuniga ko‘ra, M.M.ga nisbatan Ma’muriy javobgarlik to‘g‘risidagi kodeksning 41-moddasi (haqorat qilish), 61-2-moddasi 1-qismi (mulkni qasddan nobud qilish yoki unga zarar yetkazish), 135-moddasida (yo‘l harakati qoidalarida nazarda tutilgan hujjatlari bo‘lmagan shaxslarning transport vositalarini boshqarishi) ko‘rsatilgan huquqbuzarliklarni sodir qilgani bois to‘plangan hujjatlar maʼmuriy tartibda chora ko‘rish uchun jinoyat ishlari bo‘yicha Xonobod shahar sudiga yuborilgan.