AQSH “harbiy Shengen hududi”ni yaratish zarurligini ma’lum qildi

NATO kuchlarining Yevropadagi sobiq qo‘mondoni, amerikalik general Ben Xojes “harbiy Shengen”ni yaratish zarurligini e’lon qildi. Bu haqda The Washington Post nashri xabar bermoqda.

Tahlilchilarning Yevropaning ishonchli mudofaasini ta’minlash uchun harbiy logistikaga sarmoya kiritishi zarurligi haqidagi fikriga izoh berar ekan, amerikalik general Yevropa Ittifoqida zirhli transport vositalarini olib o‘ta oladigan vagonlar yoki zamonaviy harbiy texnika uchun yetarli darajada keng ko‘priklar hamda tunnellar yo‘qligini ta’kidladi. 

Nashrga ko‘ra, Xojes chegara nazoratisiz Yevropa bo‘ylab sayohat va savdo qilish imkonini beruvchi hudud kabi “harbiy Shengen hududi” zarurligini aytmoqda. Uning fikricha,  NATO harbiy karvonlari xuddi “olma tashiyotgan yuk mashinalari” kabi osonlik bilan chegaralarni kesib o‘ta olishi kerak.

Avvalroq Xojes NATO armiyasining Rossiya armiyasiga nisbatan zaif tomonlarini aytgan edi. Uning so‘zlariga ko‘ra, Rossiya armiyasi bilan solishtirganda, NATO armiyasining mobillik darajasi hamon past.