“Toza qonligi va sersutligi bo‘yicha O‘zbekistonda tengsiz” — Farg‘onada naslli echki boqayotgan chorvador bilan suhbat

Toshkent viloyati Bo‘stonliq tumanida 27-may kuni O‘zbekistonda ilk bor naslli echkilar ko‘rgazmasi bo‘lib o‘tdi. Ko‘rgazmada farg‘onalik chorvador Muhiddin Mamajonov “Daryo” muxbiriga bergan qisqacha intervyusida nasli tozaligi va sersutligi bo‘yicha birinchi o‘ringa loyiq ko‘rilgan echkisining xususiyatlari haqida gapirib berdi.

Muhiddin Mamajonovning aytishicha, ko‘rgazmada uning echkisi toza qonligi va sersutligi bo‘yicha birinchi o‘rinni egallagan.

“10 yildan beri toggenburg, marsiana, zaanen, alpin kabi zotli echkilarni boqib kelaman. Qo‘limdagi echkini 4 yildan beri katta qilaman, laqabi Zoya. Bugun ko‘rgazmada shu echkim naslining tozaligi, sersutligi bo‘yicha birinchi o‘rinni oldi”, — deydi u.

Chorvadorning ta’kidlashicha, bu echkilar odatda 6 litr sut beradi. Uloqchalarni emdirmay, ochiq maydonga chiqarib boqilsa, ko‘rsatkich 8 litrgacha yetishi mumkin.

“Xorijdan keltirilgan echkilarni salqin joyda boqamiz. Bundan tashqari, issiqdan, to‘g‘ridan to‘g‘ri quyosh nuridan himoya qilamiz. Bog‘larning ichida boqib moslashtirib olamiz. Bu echkilarni bozorda 1000—1500 dollarga sotib olsa bo‘ladi, ammo men ularni sotmoqchi emasman”, — deya tushuntirdi Muhiddin Mamajonov.

Ko‘rgazmada, shuningdek, buxorolik chorvador Ashur Sharopov narxi 5 ming dollardan boshlanib, 20 ming dollargacha boradigan echkilari haqida to‘xtalib, “agar echkilarni mashinaga qiyoslasak, oddiylari Tico yoki Damas, anglanubin esa Malibu yoki Captiva!”, — deb aytib o‘tgan edi.