Toshkent viloyati Bo‘stonliq tumanida 27-may kuni O‘zbekistonda ilk bor naslli echkilar ko‘rgazmasi bo‘lib o‘tdi. Unda respublikaning turli hududlaridan kelgan chorvadorlar fuqarolarni kamyob, narxi 20 ming dollargacha bo‘lgan echki zotlari bilan tanishtirib, o‘zaro tajriba almashdi, deya xabar bermoqda “Daryo” muxbiri.
.JPG)
Buxorolik chorvador Ashur Sharopovning aytishicha, echkichilik sohasiga kirib kelishiga nabirasining sog‘lig‘idagi o‘zgarish sabab bo‘lgan.
“Echkichilik sohasiga qiziqishim 2013-yilda boshlangan. Nabiramda sut tanqisligi yuzaga kelgach, tabiiy mahsulot bilan ta’minlash maqsadida o‘zimiz jaydari echkilardan sotib oldik. Asta-sekinlik bilan internet orqali sifatli echkilardan ola boshladik, hozir Rossiya, Hindiston, Pokistondan keltirilgan anglanubin, kamori, gulabi, bital, makichini kabi echki turlarimiz bor. Bizning asosiy yo‘nalishimiz — sut”, — deydi u.
.JPG)
Ashur Sharopov boqadigan echkilarning bozordagi narxi 5 ming dollardan boshlanib, 20 ming dollargacha boradi, ammo u echkilarni sotmoqchi emas.
.JPG)
“Jahon bozorida bu echkilarning narxi 5—10 ming dollardan boshlanadi. Aslida bular bebaho, lekin bir boshi 20 ming dollargacha turadi. Anglanubin turimiz uchun bu narx ham arzon, bebaho deyman. Agar echkilarni mashinaga qiyoslasak, oddiylari Tico yoki Damas, anglanubin esa Malibu yoki Captiva! Hozircha umuman sotganimiz yo‘q, maqsadimiz — echkilarning sonini 100—150 tagacha ko‘paytirish”, — deya tushuntirdi chorvador.
.JPG)
Uning ta’kidlashicha, echkilar — juda barakali jonivor.
“Echki juda tez ko‘payadi, bir tug‘ganda 4 talab bolalaydi. Bittasi 5 yilda 30—40 boshga ko‘payib ketadi. Bizning ustun tomonimiz shundaki, birorta ham tayyor echkini olib kelmaganmiz, hammasi mayda-mayda, o‘zimiz mehr berib katta qilganmiz. Bu echkilar issiq o‘lkalardan kelgan, sovuqdan qo‘rqadi. Yoz kunlarida soyada jon saqlaydi, bunda hech qanday muammo yo‘q. Asosiysi — qishda jonini saqlasangiz bo‘lgani, chunki ularda yung yo‘q”, — deya qo‘shimcha qildi Ashur Sharopov.
Izoh (0)