Buxoroda ayol uy yerto‘lasida erini pichoqlab qo‘ydi

Buxoro shahrida ayol oilaviy kelishmovchilik sabab uy yerto‘lasida o‘z erini pichoqlab qo‘ydi. Bu haqda viloyat IIB axborot xizmati xabar berdi. 

Unga ko‘ra, holat 30-may kuni soat 10:00 larda Buxoro shahar “N.Ganjaviy” mahallasi I.Mo‘minov ko‘chasida sodir bo‘lgan. Q.G. ismli ayol ko‘p qavatli uylardan biridagi ijara asosida tadbirkorlik bilan shug‘ullanib kelayotgan xonadonning yerto‘lasida turmush o‘rtog‘i R.B. bilan o‘zaro oilaviy kelishmovchilik sabab janjallashgan. 

Janjal vaqtida erining chap tomon qorin bo‘shlig‘iga oshxona pichog‘ini sanchib olgan. Sud tibbiy ekspertizasining xulosasiga ko‘ra, unga og‘ir tan jarohati yetkazgan.

Mazkur holat yuzasidan shahar IIO FMB tomonidan fuqaro Q.G.ga nisbatan Jinoyat kodeksining 126-moddasi 7-qismi bilan jinoyat ishi qo‘zg‘atilib, dastlabki tergov harakatlari olib borilmoqda.

Pichoqlash bilan yakunlangan oilaviy janjallar

Mart boshlarida Buxoroda er janjal sabab xotinini pichoqlagani, Jizzaxda er rashk sabab avval xotinini keyin esa o‘zini pichoqlab o‘ldirgani, Vobkent tumanida mast fuqaro qaynukasini pichoqlagani to‘g‘risida xabar berilgandi.

Shuningdek, 2022-yilning dekabrida Toshkent viloyatida kelin oilaviy kelishmovchilik oqibatida qaynonasini kamida 20 marotaba pichoqlagan edi. Ushbu holat yuz bergan xonadonda qaynona-kelin o‘zaro chiqisha olmay qolgan. Pichoqlangan qaynonaning aytishicha, 9 oydan beri kelini uning gaplariga kirmay, aytgan ishlarini qilmay kelgan.