“Тоза қонлиги ва серсутлиги бўйича Ўзбекистонда тенгсиз” — Фарғонада наслли эчки боқаётган чорвадор билан суҳбат

Тошкент вилояти Бўстонлиқ туманида 27 май куни Ўзбекистонда илк бор наслли эчкилар кўргазмаси бўлиб ўтди. Кўргазмада фарғоналик чорвадор Муҳиддин Мамажонов “Дарё” мухбирига берган қисқача интервьюсида насли тозалиги ва серсутлиги бўйича биринчи ўринга лойиқ кўрилган эчкисининг хусусиятлари ҳақида гапириб берди.

Муҳиддин Мамажоновнинг айтишича, кўргазмада унинг эчкиси тоза қонлиги ва серсутлиги бўйича биринчи ўринни эгаллаган.

“10 йилдан бери тоггенбург, марсиана, заанен, алпин каби зотли эчкиларни боқиб келаман. Қўлимдаги эчкини 4 йилдан бери катта қиламан, лақаби Зоя. Бугун кўргазмада шу эчким наслининг тозалиги, серсутлиги бўйича биринчи ўринни олди”, — дейди у.

Чорвадорнинг таъкидлашича, бу эчкилар одатда 6 литр сут беради. Улоқчаларни эмдирмай, очиқ майдонга чиқариб боқилса, кўрсаткич 8 литргача етиши мумкин.

“Хориждан келтирилган эчкиларни салқин жойда боқамиз. Бундан ташқари, иссиқдан, тўғридан тўғри қуёш нуридан ҳимоя қиламиз. Боғларнинг ичида боқиб мослаштириб оламиз. Бу эчкиларни бозорда 1000—1500 долларга сотиб олса бўлади, аммо мен уларни сотмоқчи эмасман”, — дея тушунтирди Муҳиддин Мамажонов.

Кўргазмада, шунингдек, бухоролик чорвадор Ашур Шаропов нархи 5 минг доллардан бошланиб, 20 минг долларгача борадиган эчкилари ҳақида тўхталиб, “агар эчкиларни машинага қиёсласак, оддийлари Tico ёки Damas, англанубин эса Malibu ёки Captiva!”, — деб айтиб ўтган эди.