Shavkat Mirziyoyev 1-iyun kuni rasmiy tashrif bilan mamlakatda bo‘lib turgan Koreya tashqi ishlar vaziri Pak Chin boshchiligidagi delegatsiyani qabul qildi. Bu haqda Prezident matbuot xizmati xabar berdi.
Unga ko‘ra, O‘zbekiston bilan Janubiy Koreya o‘rtasidagi do‘stlik va alohida strategik sheriklik munosabatlarini yanada mustahkamlash, hamkorlikni, eng avvalo, savdo-iqtisodiy, investitsiyaviy va moliyaviy-texnik sohalarda kengaytirishning dolzarb masalalari muhokama qilindi.
Uchrashuv avvalida tashqi ishlar vaziri Pak Chin mamlakat yetakchisiga Koreya prezidenti Yun Sok Yolning salomi va tilaklarini yetkazdi. Yaqin va konstruktiv siyosiy muloqotni, xalqaro tashkilotlar, shu jumladan, Birlashgan Millatlar Tashkiloti va Jahon savdo tashkiloti doirasidagi o‘zaro ko‘makni davom ettirish muhimligi qayd etildi.
Xalqaro va mintaqaviy ahamiyatga molik dolzarb masalalar ham ko‘rib chiqildi. Prezident ikki tomonlama iqtisodiy hamkorlik masalalariga to‘xtaldi. 2022-yili O‘zbekiston va Janubiy Koreya o‘rtasidagi tovar almashinuvi 24 foizga oshdi. Koreya kompaniyalaridan o‘zlashtirilgan investitsiyalar hajmi 7 milliard dollardan ortdi.
Umumiy qiymati 5 milliard dollar bo‘lgan istiqbolli loyihalar portfeli “yashil” energetika, raqamli texnologiyalar, mashinasozlik, kimyo sanoati, elektrotexnika va to‘qimachilik tarmoqlari, infratuzilmaviy rivojlanish, shaharsozlik va ko‘plab boshqa yo‘nalishlarni qamrab oladi.
O‘zbekistonning muhim investitsiyaviy va texnologik hamkorlari bo‘lgan Janubiy Koreya yetakchi kompaniyalari bilan kooperatsiya aloqalarini kuchaytirishdan manfaatdor ekani taʼkidlandi.
Katta yoshdagilar uchun to‘rtinchi darajali ko‘p tarmoqli shifoxona, onkologiya klinikasi, farmatsevtika klasteri va tibbiyot yo‘nalishidagi oliy taʼlim muassasasini barpo etish bo‘yicha ijtimoiy va strategik ahamiyatga ega loyihalarni jadallashtirish zarurligi qayd etildi.
Yarimo‘tkazgichlar innovatsion klasterini barpo etish hamda Nodir metallar va qotishmalar markazi faoliyatini rivojlantirish vazifalardan biri sifatida belgilab olindi.
2022-yilda O‘zbekistonda istiqomat qilayotganining 85 yilligini nishonlagan koreys millatiga mansub ko‘p sonli yurtdoshlarni yanada qo‘llab-quvvatlash, shu jumladan, Toshkent shahridagi Koreys madaniyati va sanʼati uyi faoliyatini kengaytirishga alohida eʼtibor qaratildi.
Izoh (0)