“Golland echkilarining bir litr sutini 16 ming so‘mdan sotamiz”. Andijonlik tadbirkor 8 litrgacha sut beradigan zaanen zotli echkilar haqida

Toshkent viloyati Bo‘stonliq tumanida 27-may kuni O‘zbekistonda ilk bor naslli echkilar ko‘rgazmasi bo‘lib o‘tdi. Ko‘rgazma jarayonida respublikaning turli hududlaridan kelgan chorvadorlar naslli, qimmatbaho echki zotlari bilan qatnashdi, o‘zaro tajriba almashdi, deya xabar bermoqda “Daryo” muxbiri.

Andijon viloyati Oltinko‘l tumanidagi fermer xo‘jaligi veterinari Shodmonali Qo‘chqorovning aytishicha, zaanen echkisi bir kunda 4—8 litr sut beradi.

“Ko‘rgazmaga Gollandiyaning zaanen zotli echkilarini olib keldik. Sut yo‘nalishida faoliyat olib boramiz. Aholi uchun sifatli pishloq, yogurt kabi mahsulotlar ishlab chiqaramiz. Hozirda bu naslning bolalarini fuqarolarga tarqatib ham beryapmiz. O‘rtacha 4 litrdan 8 litrgacha sut beradi. Yog‘li sutning bir litrini 16 ming so‘mdan sotamiz”, — deydi u.

Chorvadorning ta’kidlashicha, ushbu echki O‘zbekiston iqlimiga moslashuvchan.

“Zaanenning O‘zbekiston sharoitiga moslashuvchanligi yaxshi, salqinroq, o‘rtacha havoda o‘zini erkin his qiladi. Bu echki jahon bozorida o‘rtacha 500 dollarga baholanadi. Yo‘nalishimiz sut bo‘lgani uchun sutni qayta ishlash maqsadida biz bir yilda bir marta bolalatamiz, o‘rtacha 1 tadan 3 tagacha tug‘adi”, — deya qo‘shimcha qildi Shodmonali Qo‘chqorov.

Ko‘rgazmada, shuningdek, buxorolik chorvador Ashur Sharopov narxi 5 ming dollardan boshlanib, 20 ming dollargacha boradigan echkilari haqida to‘xtalib, “Agar echkilarni mashinaga qiyoslasak, oddiylari Tico yoki Damas, anglanubin esa Malibu yoki Captiva!”, — deb aytib o‘tgan edi.