O‘zbekistonda noqonuniy alkogol va tamaki mahsulotlari sotilayotgani haqida xabar bergan fuqarolar rag‘batlantirilishi ma’lum qilindi

Joriy yilning 4-aprel kuni O‘zbekiston prezidentining “Aholini sifatli isteʼmol tovarlari bilan taʼminlashga qaratilgan qo‘shimcha chora-tadbirlar to‘g‘risida”gi qarori imzolangan.

Hujjatda sertifikatlanmagan, saqlash muddati o‘tib ketgan, kontrafakt va isteʼmolga yaroqsiz tovarlarni ishlab chiqarish holatlari hamda ularning aylanmasiga chek qo‘yish, aholini sifatli isteʼmol tovarlari bilan taʼminlash vazifalari belgilangan.

Xususan, alkogol va tamaki mahsulotlarining noqonuniy muomalasi bilan bog‘liq qilmish uchun javobgarlikni kuchaytirish hamda jamoatchilik nazoratini taʼminlash ko‘zda tutilgan.

Soliq qo‘mitasi katta inspektori Ulug‘bek Saidov “Daryo”ga bergan intervyusida mazkur hujjat asosida qabul qilingan hukumatning 188-sonli qarorida murojaatlarni “Soliq hamkor” tizimi orqali qabul qilish, ko‘rib chiqish hamda huquqbuzarliklar haqida xabar bergan shaxslarni rag‘batlantirish belgilanganini aytdi.

“Hozirgacha “Soliq hamkor” orqali xarid cheki bermaslik, to‘lov terminali ishlatmaslik, noqonuniy tadbirkorlik faoliyatlari bo‘yicha fuqarolardan murojaatlar qabul qilinayotgandi. Endilikda tizim yanada takomillashtirildi. Fuqarolar uchun 1-iyundan boshlab sifatsiz, ruxsatnomasi yo‘q, qalbaki aksiz markali yoki aksiz markasi bo‘lmagan alokogol va tamaki mahsulotlari savdosiga guvoh bo‘lgan taqdirda holat haqida soliq idoralariga xabar yuborish imkoniyati yaratildi. Bugungi kunda barcha zaruriy choralar ko‘rilgan bo‘lib, yangilangan tizimni belgilangan muddatda ishga tushirilishi taʼminlanadi”, — dedi mutaxassis.

Soliq qo‘mitasi departament bosh inspektori Otabek Tangriberganovning aytishicha, huquqbuzarlik to‘g‘risida xabar bergan murojaatchilar qarorga asosan rag‘batlantiriladi.

“Qarorda “Soliq hamkor” tizimi orqali qonunbuzilish holati yuzasidan xabar bergan fuqaroning murojaati tekshiruvlar asosida tasdiqlansa, u Maʼmuriy javobgarlik to‘g‘risidagi kodeksda belgilangan jarimaning 20 foizi miqdorida rag‘batlantiriladi. Shuningdek, murojat yuzasidan o‘tkazilgan tekshiruvda ayblanuvchi jinoiy javobgarlikka tortilsa, murojaatchi bazaviy hisoblash miqdorining besh baravari miqdorida mukofotlanadi”, — dedi u.

Prezident qarorida 2023-yil 1-iyunga qadar alkogol va tamaki mahsulotlari aksiz markalarining yangi namunasini joriy etish belgilangan. Iqtisodiyot va Moliya vazirligi mutaxassisi Fazliddin O‘ktamovning aytishicha, mazkur vazifani bajarishga oid qaror loyihasi ishlab chiqilgan.

“Yangi namunadagi aksiz markalar masalasida vazirlik tomonidan alkogol va tamaki ishlab chiqaruvchilar bilan muhokamalar o‘tkazildi. Ularning taklif va tavsiyalari o‘rganildi. Yangi namunadagi aksiz markalarini joriy etish to‘g‘risida qaror loyihasi ishlab chiqildi. Hozir alkogol mahsulotlari uchun yaroqlilik muddati 1 yil. Qaror loyihasida bunday mahsulotlarni saqlash va yaroqlilik muddatini 2 yildan ortiq etib belgilash ko‘zda tutilmoqda”, – dedi u.

Umuman olganda, yuqoridagi qarorlar isteʼmolchilar huquqlarini himoya qilinishida, kontrafakt yoki isteʼmolga yaroqsiz tovarlarni ishlab chiqarish holatlari hamda ularning aylanmasiga chek qo‘yishda muhim ahamiyatga ega. Qolaversa, jamoatchilik nazoratini kuchaytirishda ham yaxshi samara berishi aytilmoqda.