Жорий йилнинг 4 апрель куни Ўзбекистон президентининг “Аҳолини сифатли истеъмол товарлари билан таъминлашга қаратилган қўшимча чора-тадбирлар тўғрисида”ги қарори имзоланган.
Ҳужжатда сертификатланмаган, сақлаш муддати ўтиб кетган, контрафакт ва истеъмолга яроқсиз товарларни ишлаб чиқариш ҳолатлари ҳамда уларнинг айланмасига чек қўйиш, аҳолини сифатли истеъмол товарлари билан таъминлаш вазифалари белгиланган.
Хусусан, алкогол ва тамаки маҳсулотларининг ноқонуний муомаласи билан боғлиқ қилмиш учун жавобгарликни кучайтириш ҳамда жамоатчилик назоратини таъминлаш кўзда тутилган.
Солиқ қўмитаси катта инспектори Улуғбек Саидов “Дарё”га берган интервьюсида мазкур ҳужжат асосида қабул қилинган ҳукуматнинг 188-сонли қарорида мурожаатларни “Солиқ ҳамкор” тизими орқали қабул қилиш, кўриб чиқиш ҳамда ҳуқуқбузарликлар ҳақида хабар берган шахсларни рағбатлантириш белгиланганини айтди.
“Ҳозиргача “Солиқ ҳамкор” орқали харид чеки бермаслик, тўлов терминали ишлатмаслик, ноқонуний тадбиркорлик фаолиятлари бўйича фуқаролардан мурожаатлар қабул қилинаётганди. Эндиликда тизим янада такомиллаштирилди. Фуқаролар учун 1 июндан бошлаб сифатсиз, рухсатномаси йўқ, қалбаки акциз маркали ёки акциз маркаси бўлмаган алокогол ва тамаки маҳсулотлари савдосига гувоҳ бўлган тақдирда ҳолат ҳақида солиқ идораларига хабар юбориш имконияти яратилди. Бугунги кунда барча зарурий чоралар кўрилган бўлиб, янгиланган тизимни белгиланган муддатда ишга туширилиши таъминланади”, — деди мутахассис.
Солиқ қўмитаси департамент бош инспектори Отабек Тангрибергановнинг айтишича, ҳуқуқбузарлик тўғрисида хабар берган мурожаатчилар қарорга асосан рағбатлантирилади.
“Қарорда “Солиқ ҳамкор” тизими орқали қонунбузилиш ҳолати юзасидан хабар берган фуқаронинг мурожаати текширувлар асосида тасдиқланса, у Маъмурий жавобгарлик тўғрисидаги кодексда белгиланган жариманинг 20 фоизи миқдорида рағбатлантирилади. Шунингдек, мурожат юзасидан ўтказилган текширувда айбланувчи жиноий жавобгарликка тортилса, мурожаатчи базавий ҳисоблаш миқдорининг беш баравари миқдорида мукофотланади”, — деди у.
Президент қарорида 2023 йил 1 июнга қадар алкогол ва тамаки маҳсулотлари акциз маркаларининг янги намунасини жорий этиш белгиланган. Иқтисодиёт ва Молия вазирлиги мутахассиси Фазлиддин Ўктамовнинг айтишича, мазкур вазифани бажаришга оид қарор лойиҳаси ишлаб чиқилган.
“Янги намунадаги акциз маркалар масаласида вазирлик томонидан алкогол ва тамаки ишлаб чиқарувчилар билан муҳокамалар ўтказилди. Уларнинг таклиф ва тавсиялари ўрганилди. Янги намунадаги акциз маркаларини жорий этиш тўғрисида қарор лойиҳаси ишлаб чиқилди. Ҳозир алкогол маҳсулотлари учун яроқлилик муддати 1 йил. Қарор лойиҳасида бундай маҳсулотларни сақлаш ва яроқлилик муддатини 2 йилдан ортиқ этиб белгилаш кўзда тутилмоқда”, – деди у.
Умуман олганда, юқоридаги қарорлар истеъмолчилар ҳуқуқларини ҳимоя қилинишида, контрафакт ёки истеъмолга яроқсиз товарларни ишлаб чиқариш ҳолатлари ҳамда уларнинг айланмасига чек қўйишда муҳим аҳамиятга эга. Қолаверса, жамоатчилик назоратини кучайтиришда ҳам яхши самара бериши айтилмоқда.
Изоҳ (0)