Bundan roppa-rosa 36 yil oldin, 1987-yil 30-may kuni AQSHning Las-Vegas shahrida o‘sha vaqtda og‘ir vazn toifasida WBC va WBA kamarlari sohibi Mayk Taysonning sobiq jahon chempioni Pinklon Tomasga qarshi jangi bo‘lib o‘tgan. Oltinchi raunddayoq Tomasni nokautga uchratgan Temir Mayk keyinchalik faoliyatidagi eng kuchli raqibi sifatida aynan Pinklonni ko‘rsatgan. Quyida ushbu jang tafsilotlari haqida so‘z boradi.
Pinklon Tomas 1984-yilda Tim Uizerspunni ochkolar hisobida mag‘lub etib, WBC kamariga ega chiqqandi. Keyin esa Mayk Uiverga qarshi himoya jangini o‘tkazdi va g‘olib bo‘ldi. 1986-yilda o‘tkazilgan Trevor Berbikka qarshi bahsda esa sensatsion tarzda mag‘lubiyatga uchradi. O‘sha vaqtda Tomasning narkotik moddalar bilan bog‘liq muammolari borligi ma’lum bo‘lgandi.
Mayk Tayson esa 1986-yilda og‘ir vaznda WBC kamari sohibi Trevor Berbikka qarshi jang o‘tkazib, g‘alaba qozongan va yangi chempionga aylangan. 1987-yilning 7-mart sanasida esa Jeyms Smitga qarshi WBC va WBA kamarlari uchun ringga ko‘tarilib, unda ham g‘olib chiqadi. Temir Mayk Pinklon Tomasga qarshi jangda o‘zining WBC va WBA kamarlarini birinchi marta himoya qilishi kerak edi.
Jang oldidan Tomas Taysonga qo‘l uzatadi va imkoniyat uchun rahmat aytadi. Biroq Mayk bunga haqorat bilan javob beradi.
Tayson birinchi raunddayoq g‘alaba qozonishi mumkin edi
Jangda Mayk Tayson tomoshabinlarga bir yoki ikki emas, balki ko‘proq raundlar davomida o‘z mahoratidan bahramand bo‘lish imkoniyatini berdi. U birinchi raunddayoq g‘alabani qo‘lga kiritishi mumkin edi. Pinklon chap qo‘l jeb zarbalari bilan Maykni masofada ushlashga harakat qildi. Biroq bu omadli chiqmadi. Tomas raund tugashiga 40 soniya qolganda raqibining o‘ng va chap qo‘lda berilgan huk zarbalaridan o‘zini yo‘qotdi va ring burchagiga borib qoldi. Tayson sakkiz zarbali seriyani amalga oshirdi, biroq Pinklon bunga dosh bera oldi va nokdaunga uchramadi.
Tomas tiklanishga muvaffaq bo‘ldi va keyingi to‘rtta raundda ham muvozanatni saqlay oldi. U ikkinchi raundni apperkot zarbasi bilan boshladi. Klinchdan keyin Tayson chap qo‘lda yondan bergan zarbasi bilan javob qaytardi. Pinklon seriyalar bilan ishlashni boshladi, lekin ularning hech qaysisi aniq yetib bormadi.
Uchinchi raundda Tomasning jeblari samaraliroq chiqishni boshladi va Taysonning ba’zi hujumlarini to‘xtatib ham qoldi. Bu Pinklon o‘tkazgan eng yaxshi raund edi va unda haqli ravishda g‘olib chiqqandi.
To‘rtinchi uch daqiqalikda Taysonning o‘ng qo‘lda bergan kuchli zarbasi noaniq chiqdi. Mayk biroz sarosimaga tushdi va jangni qanday uslubda davom ettirishni bilmayotgandek ko‘rinardi. Tomas raund oxirigacha Temir Maykning hujumlarini munosib zarbalar bilan kutib olishda davom etdi. Jangchiga bu raundda ham hakamlar tomonidan haqli ravishda ko‘proq ochkolar berilishi mumkin edi.
Beshinchi raund klinch bilan boshlandi. Tomas Taysonning hujumlarini jeblar bilan to‘xtatayotgandi. Pinklon jang tizginini qo‘liga olgandi va uni boshqarayotgandi. Biroq raund so‘ngida Mayk yana bir kuchli chap qo‘l zarbasini yo‘lladi. Tomas esa muvozanatni saqlab qolishga erishdi.
Tayson oltinchi raundda ikkala qo‘li bilan apperkot va huklar seriyasini uyushtirdi, ularning bir qismi raqibining jag‘ qismiga aniq yetib bordi. Tomas gandiraklab qoldi va navbatdagi hukdan keyin faoliyatida birinchi marta ringga quladi. Referining sanog‘i tugaguncha Pinklon o‘ziga kelishga ulgurmadi. Bu vaqtda uning murabbiyi Anjelo Dandi ringga chiqdi. Jang to‘xtatildi va Taysonga texnik g‘alaba yozildi.
Temir Mayk o‘zining g‘alabali seriyasini 30 ta jangga yetkazadi. Pinklon Tomas oradan bir yil o‘tib, 1988-yilda ringga qaytdi. Taysondan uchralgan mag‘lubiyatdan keyin murabbiy Anjelo Dandi Pinklon bilan mashg‘ulot o‘tkazmaslikka qaror qildi.
Jangdan keyin
Pinklon Tomasga qarshi jangdan keyin Mayk Tayson mutlaq chempion maqomi uchun Toni Takkerga qarshi ringga ko‘tariladi va g‘alaba qozonadi. Oradan ancha vaqt o‘tib, 2023-yilda Tayson faoliyatidagi eng kuchli raqib sifatida Pinklonni e’tirof etdi.
Avval Pinklon Tomas haqida o‘ylamagandim. Lekin yaqinda avvalgi janglarimni qayta ko‘rib chiqib, Pinklon Tomas faoliyatimdagi eng qiyin raqib bo‘lganini tushundim. Hammasi bir do‘stimning Tomas bilan bo‘lgan jangni qayta ko‘rishni tavsiya qilganidan so‘ng boshlandi va o‘zim uchun ilgari sezmagan ko‘plab yangi narsalarni kashf qildim. Gap shundaki uning bosh qismiga 17 ta aniq zarba bergandim. Ha, uni nokautga uchratdim, biroq buning uchun 17 ta juda kuchli zarba kerak bo‘ldi. Hech qaysi raqibim Tomas kabi bu qadar ko‘p aniq zarbaga dosh berolmasdi, — deydi Tayson.
Taysonga qarshi jangdan keyin Tomasning faoliyatida pasayish kuzatildi. Bokschi Evander Holifild, Riddik Bou va Tommi Morrisonga yutqazdi. Shundan so‘ng ikkinchi darajali bokschilar ustidan qator g‘alabalarga erishdi. 1993-yilda esa IBF kamari uchun Lourens Karterga qarshi ringga chiqdi va mag‘lubiyatga uchradi. Bahsdan keyin Tomas faoliyatini yakunlashini e’lon qildi.
Izoh (0)