Fransiyalik futbolchi Karim Benzema “Real”ni tark etishga yaqin.

AS nashrining xabariga ko‘ra, 35 yoshli futbolchiga Saudiya Arabistoni klubidan taklif mavjud. Saudiyaliklar Karimga 2 yillik shartnoma va soliqlardan tashqari yiliga 200 million yevro taklif qilgan. Shuningdek, hujumchi Saudiya Arabistoni, Gretsiya va Misrning JCH—2030 mezbonligi uchun qo‘shma arizasi bo‘yicha elchi vazifasini o‘tasa, u uchun ham alohida pul olishi belgilangan.

Benzemaning “Real” bilan shartnomasi iyun oyida o‘z nihoyasiga yetadi. Hozircha madridliklar bilan yangi bitim borasida kelishuv amalga oshmagan. 

Fransuz joriy mavsum “qaymoqranglilar” safida La Ligada 23 ta o‘yinda ishtirok etib, 18 ta gol va 3 ta golli uzatmaga mualliflik qildi. 

Avvalroq, “PSJ” hujumchisi Lionel Messiga ham Saudiya Arabistoni klubi rekord narxdagi maosh taklif qilgani xabar qilingandi.