Ўзбекистонда ID карта олмаган 16 ёшга тўлган битирувчилар ОТМга ҳужжат топшира олмайди

Ўзбекистонда абитуриентларнинг олий таълим муассасаларига кириш учун тегишли ҳужжатларни онлайн топшириш учун битирувчиларнинг паспорт (ID карта) маълумотларини АBITUR электрон дастурига киритиш талаб этилади. Бу ҳужжатсиз ОТМга кириш учун электрон ариза топшириб бўлмайди.

ОТМга ҳужжат топширишда фақат ID карта (паспорт) ва аттестат керак бўлади. Фақатгина шу ҳужжатлардаги маълумотларни базага киритиш етарли.

Мактаб ва мактабгача таълим вазирлигига кўра, мактабларни тамомлаётган 390 мингдан ортиқ ўқувчининг 16 ёшга тўлган 23 минг нафари (6 фоизи) паспорт (ID карта) олмагани сабабли уларнинг маълумотлари электрон базага ҳозирча киритилмаган бўлиб, улар тезроқ ID карта олишлари керак.

Паспорт (ID карта) олиш учун ҳудудий ички ишлар органларининг Миграция ва фуқароликни расмийлаштириш бўлимлари ва Давлат хизматлари марказига мурожаат этиш зарур.

Ўзбекистонда ID картадан фойдаланиш

2021 йил 1 январдан бошлаб барча янги туғилган чақалоқларга, Ўзбекистон фуқароларига, фуқаролиги бўлмаган шахсларга ва Ўзбекистон ҳудудида доимий яшайдиган чет эл фуқароларига биометрик паспорт ўрнига 10 йил муддатга эгасининг шахсини ва фуқаролигини тасдиқловчи ҳужжат сифатида идентификация ID картаси берилмоқда.

ID карталар фақат Ўзбекистон ҳудудида амал қилади. ID-карталарни бериш тизимли равишда 2021 йил 1 январдан 2030 йил 1 январгача мамлакат аҳолиси учун қўшимча юкламасиз амалга оширилади.

2022 йил 1 январдан Ўзбекистон фуқароси, Ўзбекистонда доимий яшовчи чет эл фуқаролари ва фуқаролиги бўлмаган шахларнинг идентификация ID картаси ҳамда Ўзбекистон фуқаросининг хорижга чиқиш биометрик паспорти (“загранпаспорт”, “қизил паспорт”)ни расмийлаштириш ва бериш давлат хизматлари марказлари орқали йўлга қўйилган.