Toshkent viloyati hokimi Zoir Mirzayev viloyatning Bekobod tumanida bo‘lib, g‘alla hosilini yig‘ish tayyorgarligini ko‘zdan kechirdi. Joriy mavsumda viloyatda qancha g‘alla hosili olinishi, hosilning qancha miqdori fermerlar qo‘lida qolishi-yu, qanchasi davlat ombori va birja savdolari orqali sotilishiga aniqlik kiritdi. Bu haqda “Daryo“gа viloyat hokimligi axborot xizmati rahbari Behzod Qobulov xabar berdi.
Qayd etilishicha, joriy mavsumda viloyatda yetishtirilgan hosilni nest-nobud qilmay, qisqa muddatda o‘rib-yig‘ib olish maqsadida 260 ta otryad tashkil etilib, shuncha kombaynlar biriktirilgan.
“Bu yil 103 ming gektar maydondan 800 ming tonnaga yaqin sara don o‘rib olish mo‘ljallanmoqda. Hosilning o‘rtacha 30 sentneri, 308 ming tonnasi 39 foizi davlat ombori hamda birja savdolari orqali sotilsa, qolgan 492 ming tonnasi fermerlarning o‘zida qolishi reja qilindi. Xususan, mavsum oldidan uni yig‘ib olish va sotishda yangi tizim shaffofligi, to‘laqonli va adolatli ishlab ketishi hamda fermer xo‘jaliklari, g‘allachilik klasterlari manfaatdorligini taʼminlash maqsad qilingan. Ichki bozorda un va don mahsulotlari narxining o‘sishi, taqchilligining oldini olish bo‘yicha respublika, viloyat masʼullari, sektor rahbarlari, klaster va fermer xo‘jaliklari, otryad rahbarlari ishtirokida seminar tashkil etildi”, — deydi hokimlik axborot xizmati rahbari.
Qo‘shimcha qilinishicha, viloyat hokimi g‘alla o‘rimiga jalb qilingan texniklarni birma-bir ko‘zdan kechirib, mavsumga tayyor bo‘lmaganlarini taʼmirlash bo‘yicha topshiriq bergan.
“Viloyat rahbari ish bir maromda, uzluksiz ketishini taʼminlash uchun, yonilg‘i moylash materiallari va boshqa zaruriy asbob-uskunalar shay qilinganligini, bu yilgi mavsum uyushqoqlik bilan o‘tkazilishini taʼminlash maqsadida, monitoring — o‘rganish tadbirlari o‘tkazilishini taʼkidladi”, — deydi Behzod Qobulov.
Yig‘im-terim oldidan tumandagi Buzruk bobo ziyoratgohida jonliq so‘yilib, ehson qilingan.
Izoh (0)