Тошкент вилояти ҳокими Зоир Мирзаев вилоятнинг Бекобод туманида бўлиб, ғалла ҳосилини йиғиш тайёргарлигини кўздан кечирди. Жорий мавсумда вилоятда қанча ғалла ҳосили олиниши, ҳосилнинг қанча миқдори фермерлар қўлида қолиши-ю, қанчаси давлат омбори ва биржа савдолари орқали сотилишига аниқлик киритди. Бу ҳақда “Дарё“га вилоят ҳокимлиги ахборот хизмати раҳбари Беҳзод Қобулов хабар берди.
Қайд этилишича, жорий мавсумда вилоятда етиштирилган ҳосилни нест-нобуд қилмай, қисқа муддатда ўриб-йиғиб олиш мақсадида 260 та отряд ташкил этилиб, шунча комбайнлар бириктирилган.
“Бу йил 103 минг гектар майдондан 800 минг тоннага яқин сара дон ўриб олиш мўлжалланмоқда. Ҳосилнинг ўртача 30 центнери, 308 минг тоннаси 39 фоизи давлат омбори ҳамда биржа савдолари орқали сотилса, қолган 492 минг тоннаси фермерларнинг ўзида қолиши режа қилинди. Хусусан, мавсум олдидан уни йиғиб олиш ва сотишда янги тизим шаффофлиги, тўлақонли ва адолатли ишлаб кетиши ҳамда фермер хўжаликлари, ғаллачилик кластерлари манфаатдорлигини таъминлаш мақсад қилинган. Ички бозорда ун ва дон маҳсулотлари нархининг ўсиши, тақчиллигининг олдини олиш бўйича республика, вилоят масъуллари, сектор раҳбарлари, кластер ва фермер хўжаликлари, отряд раҳбарлари иштирокида семинар ташкил этилди”, — дейди ҳокимлик ахборот хизмати раҳбари.
Қўшимча қилинишича, вилоят ҳокими ғалла ўримига жалб қилинган техникларни бирма-бир кўздан кечириб, мавсумга тайёр бўлмаганларини таъмирлаш бўйича топшириқ берган.
“Вилоят раҳбари иш бир маромда, узлуксиз кетишини таъминлаш учун, ёнилғи мойлаш материаллари ва бошқа зарурий асбоб-ускуналар шай қилинганлигини, бу йилги мавсум уюшқоқлик билан ўтказилишини таъминлаш мақсадида, мониторинг — ўрганиш тадбирлари ўтказилишини таъкидлади”, — дейди Беҳзод Қобулов.
Йиғим-терим олдидан тумандаги Бузрук бобо зиёратгоҳида жонлиқ сўйилиб, эҳсон қилинган.
Изоҳ (0)