Qashqadaryo viloyat maktabgacha va maktab taʼlimi boshqarmasi ijtimoiy tarmoqlar Muborak tumanidagi taʼlim muassasalarida turli noqonuniy pul yig‘imlari bo‘layotgani yuzasidan tarqalgan xabarlarga munosabat bildirdi.
Qayd etilishicha, mazkur holat yuzasidan Qashqadaryo viloyat Maktabgacha va maktab taʼlimi boshqarmasining 2023-yil 11-maydagi tegishli buyrug‘i asosida boshqarmaning masʼul xodimlari va tuzilgan maxsus ishchi guruh ishtirokida o‘rganish ishlari o‘tkazilgan.
Umumiy o‘rta taʼlim maktablarida taʼmirlash ishlari uchun turli pul yig‘imlari o‘tkazilayotgani masalasi tumandagi 3 va 4-umumiy o‘rta taʼlim maktablarining ayrim sinflaridagi o‘quvchilar bilan suhbat o‘tkazilgan. Jumladan,
- 4-umumiy o‘rta taʼlim maktabida 1-sinfda 25 nafar o‘quvchidan (sinf rahbari T.U.), 2-sinfda 30 nafar o‘quvchidan (sinf rahbari V.H.), 2-sinfda 31 nafar o‘quvchidan (sinf rahbari T.Sh.) 35 ming so‘mdan;
- 3-umumiy o‘rta taʼlim maktabida 3-sinfda 33 nafar o‘quvchidan (sinf rahbari N.M.) 25 ming so‘mdan, 4-sinf 32 nafar o‘quvchidan (sinf rahbari M.L.) 30 ming so‘mdan, 7-sinfda 27 nafar (sinf rahbari A.G.) 35 ming so‘mdan, 7-sinfda 20 nafar o‘quvchidan (sinf rahbari Q.Z.) 30 ming so‘mdan pul yig‘ilayotgani ma’lum bo‘lgan.
Aniqlangan holatlar yuzasidan tumanidagi 3- (B.Y.) va 4- (N.N.) umumiy o‘rta taʼlim maktabi direktorlariga va ularning maʼnaviy-maʼrifiy ishlar bo‘yicha o‘rinbosarlari hamda tegishli sinf rahbarlaridan tushuntirish xatlari olingan, ularga nisbatan navbatdagi intizomiy jazo choralarini qo‘llash bo‘yicha buyruq loyihalari tayyorlanib, kelishish uchun Adliya bo‘limi qoshidagi yuridik markazga yuborilgan.
Shuningdek, maktab direktorlari rag‘bat pulini yarimini bo‘lim boshlig‘iga beradi degan xabarga aniqlik kiritish maqsadida tumandagi 33 ta umumiy o‘rta taʼlim maktab direktorlarida 29 nafari bilan alohida (individual) suhbat o‘tkazilgan. O‘tkazilgan suhbat jarayonida barcha maktab rahbarlari bu xabarlar asossiz ekanini rag‘bat pullarini hammasini o‘zlari olganini, bo‘lim boshlig‘i hech qanday pul bermaganliklarini tushuntirish xatlarida bildirib o‘tgan.
Aniqlangan holatlarni bartaraf etish yuzasidan tuman maktabgacha va maktab taʼlimi bo‘limi rahbariyati va maktab direktorlariga tegishli topshiriq va ko‘rsatmalar berilgan.
May o‘rtalarida Maktabgacha va maktab taʼlimi vazirligi tomonidan “Umumiy o‘rta taʼlim muassasalarida 2022/2023-o‘quv yilini yakunlash va “So‘nggi qo‘ng‘iroq” tadbirlarini o‘tkazish bo‘yicha tavsiyalar” ishlab chiqilgandi. Tavsiyalarda o‘quvchi va bitiruvchilar hamda ularning ota-onalaridan turli xil pul yig‘imlariga yo‘l qo‘ymaslik belgilangan.
Toshkent shahar maktabgacha va maktab taʼlimi boshqarmasi esa fuqarolardan qaysidir maktab yoki maktabgacha taʼlim tashkilotlarida pul yig‘ish bilan bog‘liq holatlar kuzatilsa, 71-237-08-30 raqami orqali murojaat qilishni so‘ragan.
Izoh (0)