Maktabgacha va maktab taʼlimi vazirligi tomonidan “Umumiy o‘rta taʼlim muassasalarida 2022/2023-o‘quv yilini yakunlash va ‘So‘nggi qo‘ng‘iroq’ tadbirlarini o‘tkazish bo‘yicha tavsiyalar” ishlab chiqildi. Bu haqda Ta’lim inspeksiyasi matbuot kotibi xabar berdi.
Unga ko‘ra, umumiy o‘rta taʼlim muassasalarida “So‘nggi qo‘ng‘iroq” tadbirlari 25-may kuni ertalab soat 08:00 dan 09:00 ga qadar “Ilmni qadrlang, ilmga intiling!” shiori ostida tashkil etish tavsiya etilmoqda.
Shuningdek:
- tadbirni tartibli o‘tkazish va o‘quvchilar xavfsizligini taʼminlash maqsadida o‘quvchilar sonidan kelib chiqqan holda ushbu tadbirga faqatgina 1-, 4-, 9-, 11-sinf o‘quvchilarini jalb etish;
- tadbirni mahalla qo‘mitasi, ota-onalar va huquqni muhofaza qilish idoralari vakillari bilan hamkorlikda yong‘in va texnika xavfsizligi qoidalariga amal qilgan holda o‘tkazish hamda maktab hududiga texnika vositalari va begona shaxslarning kiritilmasligini taʼminlash;
- “So‘nggi qo‘ng‘iroq” tadbirlarini, bosqichli nazorat imtihonlari va yakuniy davlat attestatsiyalarini o‘tkazishda, taʼlim muassasalarini yangi o‘quv yiliga tayyorlash borasida o‘quvchi va bitiruvchilar hamda ularning ota-onalaridan turli xil pul yig‘imlariga yo‘l qo‘ymaslik;
- maktab hayotida faol ishtirok etayotgan o‘quvchilarning ota-onalarini maʼnaviy rag‘batlantirishga alohida eʼtibor qaratish.
Vazirlik “So‘nggi qo‘ng‘iroq” bayram tadbirini tantanali qismini o‘tkazish bo‘yicha namunaviy ssenariyni ham ishlab chiqqan.
O‘zbekistondagi maktablarda pedagoglar soni
2022/2023-o‘quv yilida respublika bo‘yicha umumta’lim muassasalarida ta’lim berayotgan pedagoglar soni (o‘rindoshlarsiz) 521,6 ming nafarni tashkil etgan. Shundan 159,9 ming nafari yoki jami pedagoglarning 30,7 foizini erkak pedagoglar tashkil etgan.
2022/2023-o‘quv yilida 2018/2019-o‘quv yiliga nisbatan erkak pedagoglar soni 27,8 ming nafarga yoki 21,0 foizga ko‘paygan. Samarqand va Qashqadaryo viloyatlarida maktablarda ta’lim berayotgan erkak pedagoglar soni ko‘p.
Izoh (0)