Qoraqalpog‘iston tibbiyot instituti klinikasida gospital turdagi “Mehrli maktab” filiali ochildi, deb xabar bermoqda “Zamin” xalqaro jamoat fondi matbuot xizmati.
Ma’lum qilinishicha, Ziroat Mirziyoyeva bu yerga tashrif buyurib, yaratilgan sharoitlar bilan tanishdi, bolalar bilan samimiy suhbatlashib, pedagog va ota-onalarga dalda so‘zlarini izhor etdi.
“Mehrli maktab” davlat taʼlim muassasasi 2022-yil mayda hukumat qarori bilan tashkil etilgandi. Unda uzoq vaqt davomida davolanayotgan hamda oddiy maktab yoki bog‘chaga qatnash imkoniyati bo‘lmagan bolalar bilim oladi va tarbiyalanadi. Ular reabilitatsiya jarayonidan ham shu yerning o‘zida ota-onalari ishtirokida o‘tadi.
“Gematologiya, onkologiya, klinik immunologiya, boshqa statsionar va uzoq muddatli ambulator davolanishda bo‘lgan bolalarga taʼlim va tarbiya berish tizimini yanada kengaytirish chora-tadbirlari to‘g‘risida”gi hukumat qaroriga ko‘ra “Mehrli maktab” filiallari 2023—2028-yillarda bosqichma-bosqich, biroq har yili kamida 3 ta hududda tashkil etilishi belgilangan.
Fond xabarida qayd etilishicha, yil yakuniga qadar “Mehrli maktab” filiallari Andijon va Farg‘onada ochiladi.
Izoh (0)