Қашқадарё вилоят мактабгача ва мактаб таълими бошқармаси ижтимоий тармоқлар Муборак туманидаги таълим муассасаларида турли ноқонуний пул йиғимлари бўлаётгани юзасидан тарқалган хабарларга муносабат билдирди.
Қайд этилишича, мазкур ҳолат юзасидан Қашқадарё вилоят Мактабгача ва мактаб таълими бошқармасининг 2023 йил 11 майдаги тегишли буйруғи асосида бошқарманинг масъул ходимлари ва тузилган махсус ишчи гуруҳ иштирокида ўрганиш ишлари ўтказилган.
Умумий ўрта таълим мактабларида таъмирлаш ишлари учун турли пул йиғимлари ўтказилаётгани масаласи тумандаги 3 ва 4-умумий ўрта таълим мактабларининг айрим синфларидаги ўқувчилар билан суҳбат ўтказилган. Жумладан,
- 4-умумий ўрта таълим мактабида 1-синфда 25 нафар ўқувчидан (синф раҳбари Т.У.), 2-синфда 30 нафар ўқувчидан (синф раҳбари В.Ҳ.), 2-синфда 31 нафар ўқувчидан (синф раҳбари Т.Ш.) 35 минг сўмдан;
- 3-умумий ўрта таълим мактабида 3-синфда 33 нафар ўқувчидан (синф раҳбари Н.М.) 25 минг сўмдан, 4-синф 32 нафар ўқувчидан (синф раҳбари М.Л.) 30 минг сўмдан, 7-синфда 27 нафар (синф раҳбари А.Г.) 35 минг сўмдан, 7-синфда 20 нафар ўқувчидан (синф раҳбари Қ.З.) 30 минг сўмдан пул йиғилаётгани маълум бўлган.
Аниқланган ҳолатлар юзасидан туманидаги 3- (Б.Й.) ва 4- (Н.Н.) умумий ўрта таълим мактаби директорларига ва уларнинг маънавий-маърифий ишлар бўйича ўринбосарлари ҳамда тегишли синф раҳбарларидан тушунтириш хатлари олинган, уларга нисбатан навбатдаги интизомий жазо чораларини қўллаш бўйича буйруқ лойиҳалари тайёрланиб, келишиш учун Адлия бўлими қошидаги юридик марказга юборилган.
Шунингдек, мактаб директорлари рағбат пулини яримини бўлим бошлиғига беради деган хабарга аниқлик киритиш мақсадида тумандаги 33 та умумий ўрта таълим мактаб директорларида 29 нафари билан алоҳида (индивидуал) суҳбат ўтказилган. Ўтказилган суҳбат жараёнида барча мактаб раҳбарлари бу хабарлар асоссиз эканини рағбат пулларини ҳаммасини ўзлари олганини, бўлим бошлиғи ҳеч қандай пул бермаганликларини тушунтириш хатларида билдириб ўтган.
Аниқланган ҳолатларни бартараф этиш юзасидан туман мактабгача ва мактаб таълими бўлими раҳбарияти ва мактаб директорларига тегишли топшириқ ва кўрсатмалар берилган.
Май ўрталарида Мактабгача ва мактаб таълими вазирлиги томонидан “Умумий ўрта таълим муассасаларида 2022/2023-ўқув йилини якунлаш ва “Сўнгги қўнғироқ” тадбирларини ўтказиш бўйича тавсиялар” ишлаб чиқилганди. Тавсияларда ўқувчи ва битирувчилар ҳамда уларнинг ота-оналаридан турли хил пул йиғимларига йўл қўймаслик белгиланган.
Тошкент шаҳар мактабгача ва мактаб таълими бошқармаси эса фуқаролардан қайсидир мактаб ёки мактабгача таълим ташкилотларида пул йиғиш билан боғлиқ ҳолатлар кузатилса, 71-237-08-30 рақами орқали мурожаат қилишни сўраган.
Изоҳ (0)