Shavkat Mirziyoyevning taklifiga binoan Singapur prezidenti Halima Yaqub davlat tashrifi bilan O‘zbekistonda bo‘lib turibdi. Bu haqda Prezident matbuot xizmati xabar berdi.
Bugun, 24-may kuni Ko‘ksaroy qarorgohida Singapur rahbarini rasmiy kutib olish marosimi bo‘lib o‘tdi. Qarorgoh oldidagi maydonda faxriy qorovul saf tortdi.
Prezident Shavkat Mirziyoyev oliy martabali mehmonni samimiy qarshi olib, shohsupaga taklif qildi. Harbiy orkestr ikki davlat madhiyalarini ijro etdi. Shundan so‘ng prezidentlar faxriy qorovul safi oldidan o‘tib, rasmiy delegatsiyalar aʼzolarini qutladilar.
“Birgalikda suratga tushishdan so‘ng oliy darajadagi muzokaralar boshlandi”, — deyiladi xabarda.
Shavkat Mirziyoyevning taklifiga binoan Singapur prezidenti Halima Yaqub 23-may kuni davlat tashrifi bilan O‘zbekistonga kelgandi. Oliy martabali mehmon va Singapur delegatsiyasi a’zolari “Yangi O‘zbekiston” bog‘iga tashrif buyurib, Mustaqillik monumenti poyiga gul qo‘ydi, O‘zbekistonning istiqlol yillaridagi rivojlanishi va ushbu betakror majmuaning yaratilishi tarixi bilan tanishdi, milliy madaniy markazlar vakillari bilan uchrashdi. Tashrifning asosiy tadbirlari ertaga bo‘lib o‘tadi.
Izoh (0)