Singapur prezidenti O‘zbekistonga UzAirways’ning yo‘lovchi reysi orqali yetib keldi

Shavkat Mirziyoyevning taklifiga binoan Singapur prezidenti Halima Yaqub 23-may kuni davlat tashrifi bilan O‘zbekistonga keldi.

Prezident va uning turmush o‘rtog‘i 21—23-may kunlari Qozog‘istonga davlat tashrifini amalga oshirdi va 23-may kuni Uzbekistan Airways’ning doimiy reysi (HY722) orqali Ostonadan Toshkentga yetib keldi.

Toshkent aeroportida oliy martabali mehmon sharafiga ikki davlat bayroqlari ko‘tarildi va faxriy qorovul saf tortdi. Singapur prezidenti va uning turmush o‘rtog‘ini bosh vazir o‘rinbosari Zulayho Mahkamova, tashqi ishlar vaziri Baxtiyor Saidov va Toshkent shahri hokimi vazifasini bajaruvchi Shavkat Umurzoqov kutib oldi. Singapur prezidenti Toshkent shahridagi restoranda ovqatlandi.

Oliy martabali mehmon va Singapur delegatsiyasi a’zolari “Yangi O‘zbekiston” bog‘iga tashrif buyurib, Mustaqillik monumenti poyiga gul qo‘ydi, mamlakatimizning istiqlol yillaridagi rivojlanishi va ushbu betakror majmuaning yaratilishi tarixi bilan tanishdi, milliy madaniy markazlar vakillari bilan uchrashdi. Tashrifning asosiy tadbirlari ertaga bo‘lib o‘tadi.