Сингапур президенти давлат ташрифи билан Ўзбекистонга келгани тўғрисида хабар берилганди. Ҳалима Яқуб ташрифидан олдин берган интервьюсида Сингапур қандай қилиб ривожлангани ҳақида гапирди.
.jpg)
Унинг сўзларига кўра, Сингапур ривожланиши тарихи тасодифий эмас, балки у қатор омиллар натижасида, шу жумладан, мамлакат мустақиллигининг дастлабки йилларида кашшоф авлоднинг машаққатли меҳнати ва Ли Куан Юнинг моҳирона раҳбарлиги остида асосчи оталарнинг узоқни кўзлаб иш юритган раҳбарлиги натижасида равнақ топган.
“Тошкент шаҳридан икки бараваргина катталикдаги ва табиий ресурсларга эга бўлмаган мўжаз шаҳар-давлатда халқимизга иш ўринларини яратиш учун инсон капитали ва ҳаётбахш иқтисодиётни ривожлантиришга катта маблағ сарфлашга мажбур бўлган эдик. Биз очиқ иқтисодиётга кўмаклашиш ва хорижий компанияларни Сингапурга сармоя киритишга таклиф қилиш асносида ўзимизнинг Жануби-Шарқий Осиёдаги стратегик ўрнимиздан фойдаландик. Биз эзгу бошқарувни, қонун устуворлиги, меритократия ва ҳалоллик тамойилларини ўзимизга дастуриламал қилиб олдик”, — дейди Ҳалима Яқуб.
Сингапур раҳбарининг таъкидлашича, узоқ муддатли режалаштириш ва сиёсий барқарорлик айрим муваффақиятларининг энг асосий сабаблари сирасига киради. “Мустақилликка эришганимиздан бошлабоқ биз дунёда рақобатбардош бўлишимиз учун инглиз тилини ишчи тилимизга айлантиришга қарор қилдик, чунки инглиз тили глобал бизнес ва савдо тили эди. Бу, шунингдек, ирқи ва маданий келиб чиқишидан қатъи назар, барча сингапурликлар учун умумий мулоқот тилини тақдим этди. Шу билан бирга, бизнинг икки тилли сиёсатимиз халқимизнинг маданий ўзига хослигини сақлаб қолишда давом этишини таъминламоқда”, — дейди у.
Сингапур президентининг қайд этишича, ялпи ички маҳсулотидан (ЯИМ) уч баравар кўп бўлган савдо ҳажмига эга кичик шаҳар-давлат сифатида Сингапурнинг очиқ ва ташқи дунёга йўналтирилган мамлакат ҳолида қолиши ҳамда имкон қадар кўпроқ давлат ва шериклар билан яхши муносабатлар ўрнатиши муҳимдир. Сингапур каби кичик давлатларга алоқадор бўлган иқлим ўзгариши ва пандемияга тайёрлик таъминланиши сингари кўпгина глобал муаммоларнинг ҳал қилиниши нуқтаи назаридан халқаро ҳамкорлик муҳим ҳаётий аҳамият касб этади.
1992 йилда Сингапур бошқа ривожланаётган мамлакатлар билан тараққиёт тажрибаларини алмашиш ва уларга бир-биридан ўрганиш имкониятини бериш учун Сингапур ҳамкорлик дастурини (СҲД) таъсис этган. Бу дастур инсон ресурсларини ривожлантириш давлат қурилишининг калити эканлигига бўлган ишонч устига қурилган эди. Ўшандан бери 150 минг нафар хорижий ҳукумат амалдорлари СҲД доирасида амалга оширилган турли-туман салоҳиятни ошириш дастурларидан фойдаланишди. Ўтган йили Сингапур ҳамкорлик дастури ўзининг 30 йиллигини нишонлади ва мен Ўзбекистон расмийларининг ушбу дастурда янада кўпроқ иштирок этишларини олқишлайман.
Шавкат Мирзиёевнинг таклифига биноан Сингапур президенти Ҳалима Яқуб 23 май куни давлат ташрифи билан Ўзбекистонга келганди. Олий мартабали меҳмон ва Сингапур делегацияси аъзолари “Янги Ўзбекистон” боғига ташриф буюриб, Мустақиллик монументи пойига гул қўйди, Ўзбекистоннинг истиқлол йилларидаги ривожланиши ва ушбу бетакрор мажмуанинг яратилиш тарихи билан танишди, миллий маданий марказлар вакиллари билан учрашди. Ташрифнинг асосий тадбирлари эртага бўлиб ўтади.
Изоҳ (0)