Ҳиндистон фармацевтика компаниялари 1 июндан бошлаб давлат лабораторияларида йўтал сироплари сифатини текшириши шарт. Бу ҳақда мамлакат ташқи савдо бош бошқармаси буйруғига таяниб, Reuters хабар берди.
.jpg)
Экспорт учун мўлжалланган йўтал сиропларига мажбурий тест жорий этилади. Қарор Гамбия ва Ўзбекистонда Ҳиндистонда ишлаб чиқарилган препаратларни қабул қилган 20 нафардан ортиқ болалар ўлимидан сўнг Ҳиндистон расмийлари томонидан қабул қилинган.
“Йўтал сиропининг экспорти 2023 йил 1 июндан бошлаб экспорт намуналарини синовдан ўтказиш ва айрим давлат лабораторияларида сертификат олиш шарти билан рухсат этилади”, — дейилади ҳужжатда.
Ҳиндистон 2022-2023 молиявий йилда (1 апрелда якунланган) 17,6 миллиард долларлик йўталга қарши сиропларини экспорт қилган. Препаратлар Африка, Бирлашган Араб Амирликлари, Буюк Британия, Непал ва бошқа мамлакатларга етказиб берилади.
Март ойида Ҳиндистон сифатсиз дори ишлаб чиқарувчиларга қарши кураш доирасида 18 фармацевтика компаниясининг лицензияларини бекор қилган. Ҳиндистонда ишлаб чиқарилган препаратлар туфайли дунё бўйлаб ўлим ва касаллик ҳақидаги хабарлар фонида расмийлар республиканинг 20 штатида текширув ўтказган.
Нега Ҳиндистонда ишлаб чиқарилган дорилар хавфсизлик билан боғлиқ муаммоларни келтириб чиқармоқда?
Ҳиндистон ривожланаётган мамлакатларнинг тиббий эҳтиёжларининг катта қисмини қондирадиган умумий дори воситаларининг дунёдаги энг йирик экспортчиси ҳисобланади.
Аммо сўнгги ойларда кўплаб ҳинд фирмалари ўз дори-дармонларининг сифати учун текширувдан ўтмоқда ва мутахассислар ушбу препаратларнинг ишлаб чиқариш амалиётидан ташвишланмоқда.
Октябрь ойида ЖССТ глобал огоҳлантиришни эълон қилган ва Маiden Pharmaseuticals томонидан ишлаб чиқарилган тўртта йўтал сиропи Гамбияда буйрак шикастланишидан 66 боланинг ўлимига олиб келганини айтган.
Ҳиндистон ҳукумати ҳам, Маiden Pharmaseuticals компанияси ҳам бу айбловларни рад этган.
Март ойида Ҳиндистон йўтал сироплари Ўзбекистонда болаларнинг ўлимига алоқадор бўлган фирманинг ишлаб чиқариш лицензиясини бекор қилган.
Ўзбекистонда “Док-1 Макс” сиропининг истеъмол қилиниши оқибатлари
Ҳиндистонда ишлаб чиқарилган “Док-1 Макс” сиропини истеъмол қилиш ортидан Ўзбекистонда 20 нафардан ортиқ бола вафот этгани маълум қилинган.
Давлат хавфсизлик хизмати томонидан “Док-1 Макс” препарати билан боғлиқ ҳолат юзасидан жиноят иши қўзғатилган. Ўзбекистонда “Док-1 Макс”ни ишлаб чиқарган компанияга тегишли барча дорилар савдоси вақтинча тўхтатилди.
Шавкат Мирзиёев 30 декабрдаги йиғилишда Фармацевтика тармоғини ривожлантириш агентлиги раҳбари Сардор Кариев ишдан олган. Сардор Кариев 2019 йилнинг февралидан буён Соғлиқни сақлаш вазирлиги ҳузуридаги Фармацевтика тармоғини ривожлантириш агентлиги директори лавозимида фаолият юритиб келаётганди.
ЖССТ Ўзбекистонда “Док-1 Макс” дорисидан болалар ўлгани юзасидан муносабат билдирган. Ҳиндистон ҳукумати эса “Док-1 Макс” дорисини ишлаб чиқарувчи компаниянинг лицензиясини тўхтатган. Ҳиндистонда “Док-1 Макс” дорисини ишлаб чиқарган завод устидан текширувнинг дастлабки натижалари эълон қилинган.
Сироп билан боғлиқ ўлим ҳолати бошқа давлатларда ҳам аниқлангани маълум бўлди, бироқ улар айнан қайси препаратлар оқибатида экани айтилмаган. Жумладан, Индонезияда 2022 йилдан бери 200 га яқин бола сироп истеъмол қилиши ортидан юзага келган ўткир буйрак шикастланишидан вафот этган. Гамбияда ҳам болалар Ҳиндистон фармацевтика компанияси томонидан ишлаб чиқилган йўталга қарши сиропни истеъмол қилиши ортидан ўлган.
Изоҳ (0)