Dunyoning eng badavlat kishisi, LVMH guruhi egasi Bernard Arnoning boyligi kompaniya aksiyalarining tushib ketishi fonida bir kunda 11,2 milliard dollarga kamaydi, deb yozmoqda Bloomberg.
Agentlik maʼlumotlariga ko‘ra, 23-may kuni Parijning Euronext birjasidagi savdolar chog‘ida LVMH aksiyalari 5 foizga arzonlashgan. Umuman olganda, Yevropaning qimmatbaho mahsulotlar ishlab chiqaruvchi kompaniyalari ushbu sessiya davomida 30 milliardga yaqin mablag‘ yo‘qotdi. Bloomberg ma’lumotlariga ko‘ra, bozorda AQSH iqtisodiyotining zaiflashishi bunday mahsulotlarga bo‘lgan talabni kamaytiradi, degan xavotirlar fonida kompaniyalar aksiyalari tushib ketmoqda.
LVMH guruhi Louis Vuitton, Moet & Chandon, Christian Dior, Fendi, Givenchy va boshqa hashamatli brendlarni o‘z ichiga oladi. LVMH aksiyalari pasayishdan avval uzoq vaqt o‘sishda davom etayotgan edi: o‘tgan yil davomida qog‘ozlar 23 foizga qimmatlashdi. Aprel oyida LVMH kapitallashuvi 500 milliard dollardan ortiq bo‘lgan Yevropadagi birinchi kompaniyaga aylandi.
Aprel oyida Arno ilk bor dunyoning eng boy odamlari ro‘yxatida birinchi o‘ringa chiqdi. O‘shanda u biznesmen Ilon Maskning o‘rnini egalladi. Forbes xabar berishicha, Arnoning boyligi yil davomida 53 milliard dollarga oshgan.
LVMH aksiyalari tushib ketganidan keyin ham kompaniya rahbari reytingda birinchi o‘rinni saqlab qoldi. Bloomberg uning boyligini 191,6 milliard dollarga baholamoqda.
Izoh (0)