Дунёнинг энг бадавлат кишиси, LVMH гуруҳи эгаси Бернард Арнонинг бойлиги компания акцияларининг тушиб кетиши фонида бир кунда 11,2 миллиард долларга камайди, деб ёзмоқда Bloomberg.
Агентлик маълумотларига кўра, 23 май куни Парижнинг Euronext биржасидаги савдолар чоғида LVMH акциялари 5 фоизга арзонлашган. Умуман олганда, Европанинг қимматбаҳо маҳсулотлар ишлаб чиқарувчи компаниялари ушбу сессия давомида 30 миллиардга яқин маблағ йўқотди. Bloomberg маълумотларига кўра, бозорда АҚШ иқтисодиётининг заифлашиши бундай маҳсулотларга бўлган талабни камайтиради, деган хавотирлар фонида компаниялар акциялари тушиб кетмоқда.
LVMH гуруҳи Louis Vuitton, Моet & Chandon, Christian Dior, Fendi, Givenchy ва бошқа ҳашаматли брендларни ўз ичига олади. LVMH акциялари пасайишдан аввал узоқ вақт ўсишда давом этаётган эди: ўтган йил давомида қоғозлар 23 фоизга қимматлашди. Апрель ойида LVMH капиталлашуви 500 миллиард доллардан ортиқ бўлган Европадаги биринчи компанияга айланди.
Апрель ойида Арно илк бор дунёнинг энг бой одамлари рўйхатида биринчи ўринга чиқди. Ўшанда у бизнесмен Илон Маскнинг ўрнини эгаллади. Forbes хабар беришича, Арнонинг бойлиги йил давомида 53 миллиард долларга ошган.
LVMH акциялари тушиб кетганидан кейин ҳам компания раҳбари рейтингда биринчи ўринни сақлаб қолди. Bloomberg унинг бойлигини 191,6 миллиард долларга баҳоламоқда.
Изоҳ (0)