Germaniya va Vengriya tashqi ishlar vazirlari Ukrainaga yordam berish masalasida janjallashdi. Bunga Kiyev Vengriyaning OTP bankini urushning xalqaro homiysi sifatida tan olganidan so‘ng Budapesht Ukrainaga Yevropa Ittifoqining yordamini to‘sib qo‘yishga qaror qilgani sabab bo‘ldi, deb yozmoqda Politico nashri.
Ikki vazir o‘rtasidagi janjal haqida jurnalistlarga ismi sir qolishni istagan to‘rt diplomat aytib berdi. Ularning so‘zlariga ko‘ra, voqea 22-may kuni Bryusselda tashqi ishlar vazirlarining uchrashuvi chog‘ida sodir bo‘lgan.
Vengriya Kiyev OTP bankini “urush homiylari” ro‘yxatidan chiqarib tashlamaguncha, Yevropa Ittifoqining Ukrainaga qo‘shimcha harbiy yordamini ma’qullashdan bosh tortmoqda. Diplomatlar tortishuv Rossiyaga qarshi yangi sanksiyalarni kechiktirayotganini ham aytdi.
Vengriya tashqi ishlar vaziri Pyoter Siyarto Budapeshtning Ukrainaga yordam berishni to‘xtatish niyatini tasdiqlaganida, Germaniya tashqi ishlar vaziri Annalena Berbok unga norozilik bildirgan. Berbok OTP banki bosib olingan Ukraina hududlarini Rossiyaning bir qismi sifatida tan olgani va rus askarlariga kredit liniyalari taqdim etgani haqidagi aniqlashtirilmagan xabarlarni o‘rtaga tashlagan.
Vengriya vaziri bu da’volarni rad etib, bankning “Ukrainani qo‘llab-quvvatlashini oshkora izhor etuvchi” bayonotlarini keltirgan. Uchrashuvda Shvetsiya va Estoniya vakillari ham Vengriyaga bosim o‘tkazgan. Ular Yevropa Ittifoqining sanksiyalarini aylanib o‘tishni to‘xtatishga qaratilgan yangi sanksiyalar joriy qilishni va Ukrainaga ko‘proq harbiy yordam berishni kechiktirmaslik zarurligini ta’kidlagan.
“Ushbu tortishuv Yevropa Ittifoqi davlatlarining Rossiyani jazolash va Ukrainani qo‘llab-quvvatlash bo‘yicha ko‘plab harakatlarni bloklayotgan Vengriyaga nisbatan noroziligi kuchayib borayotganini aks ettiradi, Garchi Budapesht imtiyozlar olganidan keyin taslim bo‘lishga moyillik bildirsa-da, kechikishlar ko‘pchilikning g‘azabiga sabab bo‘lmoqda”, — deb yozadi gazeta.
OTP banki bilan vaziyat
May oyi boshida Ukraina korrupsiyaning oldini olish milliy agentligi Vengriya OTP bankini urushning xalqaro homiylari ro‘yxatiga kiritdi. Bunday qarorga bankning Rossiyadagi faoliyatini davom ettirish pozitsiyasi hamda Donetsk va Lugansk “xalq respublikalari”ning amalda tan olinishi sabab bo‘ldi.
Kompaniyaning “urush homiylari” ro‘yxatiga kiritilishi hech qanday huquqiy oqibatlarga olib kelmasa-da, Rossiyaga qarshi harakatlarga to‘sqinlik qilib kelayotgan Vengriya buni bahona qilib, nihoyat, Yevropaning Ukrainaga harbiy yordamini blokladi. Budapesht bankni ro‘yxatdan olib tashlashni talab qilmoqda.
Izoh (0)