АҚШнинг 44-президенти Барак Обама ва яна 499 нафар америкалик учун Россияга кириш тақиқланди. Бу чора АҚШнинг Москвага қарши санкцияларига жавобан киритилди, деб хабар бермоқда Россия Ташқи ишлар вазирлиги сайти.
“(АҚШ президенти) Жо Байден маъмурияти томонидан Россияга қарши мунтазам равишда жорий этилаётган ҳамда Вашингтоннинг режасига кўра, Россияга максимал даражада зарар етказишга, расмийлар ва мамлакатимизнинг оддий фуқароларига шахсан таъсир кўрсатишга қаратилган санкцияларга жавобан Россия Федерациясига 500 нафар америкаликнинг кириши тақиқланди”, — дейилади ТИВ баёнотида.
“Стоп-лист”га киритилган АҚШ фуқаролари орасида конгрессменлар ва Украинага қурол етказиб берувчи ҳарбий-саноат комплекси компаниялари раҳбарлари, комиклар Стивен Колберт ва Жимми Киммел, шунингдек, 2021 йилда Капитолийга бостириб кирган оломонни таъқиб қилишда “бевосита иштирок этган кишилар” бор.
Аввалроқ АҚШ молия вазирлиги Россияга қарши санкциялар кенгайтирилганини эълон қилганди. Россия ва бошқа мамлакатлардан 200 га яқин компания ва 46 жисмоний шахс янги чекловлар остига тушган.
2022 йил февралида Россиянинг Украинага кенг миқёсли босқини бошланганидан буён АҚШ ва унинг 37 та иттифоқчиси Россияга нисбатан мисли кўрилмаган санкциялар киритди. Reuters таъкидлаганидек, чекловларнинг сўнгги босқичи асосан Россия саноатига қаратилган.
Изоҳ (0)