Украина йирик давлатлар ўртасидаги қарама-қаршиликда фронт чизиғига айланмаслиги керак, деди Хитой Ташқи ишлар вазири вакили Ван Венбин “ТАСС” агентлигига.
Хитойлик амалдор АҚШ собиқ давлат котиби Генри Киссинжернинг Украинани НАТОга қабул қилиш ҳақидаги таклифига шундай муносабат билдирди.
“Хитойнинг Украина масаласидаги позицияси ҳар доим аниқ бўлиб келган: биз Украина йирик давлатлар ўртасидаги қарама-қаршиликда фронт чизиғига айланмаслиги керак, деб ҳисоблаймиз”, — деди Ван Венбин.
У барча томонларни вазминликни сақлашга ва инқирозни янада кучайтирадиган ҳаракатлардан тийилишга чақирди.
Киссинжернинг таклифига Россия собиқ президенти, амалдаги Хавфсизлик Кенгаши раҳбари ўринбосари Дмитрий Медведев ҳам жавоб қайтарди.
Унинг айтишича, альянснинг Россия билан гибрид уруши контекстида Украинани НАТОга қабул қилиш таклифи ва Киевнинг йўқотилган ҳудудларни қайтариб олиш истаги Вашингтон жамоавий мудофаа шартномасининг бешинчи моддасини фаоллаштиради.
5-моддада НАТОнинг бир аъзосига ҳужум бутун НАТОга қилинган ҳужум бўлиб, альянснинг барча аъзолари жавобини келтириб чиқариши белгилаб қўйилган. Аммо ушбу моддани қўллаш бўйича қарор НАТО аъзолари ўртасидаги маслаҳатлашувлардан сўнг қабул қилинади.
Медведевнинг таъкидлашича, агар Украина НАТОга қабул қилинса ва альянс Россия билан бевосита зиддиятда бўлган давлатни жамоавий мудофаа қилишга ўтса, Москва “барча эҳтимолий воситалар билан қаттиқ жавоб қайтариш”га мажбур бўлади.
99 ёшли Генри Киссинжер The Economist нашрига берган интервьюсида Украинани Россия билан ҳозирги ва келгусидаги можаролардан ҳимоя қилиш, мамлакатни ҳудудий баҳслардан йироқ тутиш учун уни НАТОга қабул қилиш кераклиги, чунки “мамлакат раҳбариятининг ўзи тажрибасиз” эканини айтганди.
Украина 2022 йил сентябрида НАТОга қўшилиш учун ариза топширган. Янги давлатларни қабул қилиш учун иттифоқнинг барча аъзолари розилиги талаб қилинади.
НАТОга аъзо давлатларнинг навбатдаги саммити июль ойида Литвада бўлиб ўтади. Апрель ойида НАТО бош котиби Йенс Столтенберг келгусида Украинанинг альянсга аъзо бўлиши масаласида барча иттифоқчилар келишиб олганини маълум қилганди. Унинг сўзларига кўра, ҳозир НАТОнинг асосий мақсади Украинанинг Россия билан урушда ғалаба қозонишини таъминлашдан иборат.
Изоҳ (0)