Toshkent shahri Bektemir tumanidagi 348-maktabda o‘quvchini ilon chaqib oldi. Poytaxt maktabgacha va maktab ta’limi boshqarmasi holat yuzasidan ma’lumot berdi.
Qayd etilishicha, maktab binosi 1978-yilda qurilgan bo‘lib, Toshkent viloyati O‘rta Chirchiq tumanining ekinzor dala hududi bilan chegaradosh qismida joylashgan. Maktab hududining chegaradosh qismida katta oqava suv kanali o‘tgan.
10-may kuni soat 12:30 da 6-sinf o‘quvchisi O‘.A.ni maktab binosining ikkinchi qavati deraza rom qismining tirqishidan ilon chaqib olgan. O‘quvchiga shu vaqtning o‘zida birinchi tez tibbiy yordam ko‘rsatilib, shifoxonaga olib borilgan. U yerda o‘quvchi to‘liq tibbiy tekshiruvdan o‘tkazilib, jiddiy jarohat olmagani aniqlangan.
Boshqarma axborot xizmatining qo‘shimcha qilishicha, maktab binosida 2008-yildan buyon ta’mirlash ishlari olib borilmagan bo‘lib, 2023-yilning mart—aprel oylarida “Tashabbusli budjet” loyihasi asosida maktabning tom qismi mukammal ta’mirlandi. Maktab davlat dasturiga ko‘ra, 2024-yilda to‘liq mukammal ta’mirlanishi ko‘zda tutilgan.
Izoh (0)