Surxondaryo viloyati Denov tumani 1-son kasb-hunar maktabi har xil turdagi bannerlar tayyorlash bo‘yicha boshlang‘ich qiymati 105 million so‘mlik tender o‘tkazgan. “Daryo” muxbiri hujjatlarni monitoring qilish davomida savdoda ishtirok etgan korxonalar bir shaxsga tegishli ekanini aniqladi.
Tender dasturiy ta’minot, chop etish, ovoz va videoyozuvlarni nusxalash xizmatlarini ko‘rsatish uchun bo‘lib o‘tgan. G‘olib tashkilot 15 kun ichida aytilgan xizmatni bajarib berishi kerak.
Lotni yutish uchun ikkita tadbirkorlik subyekti raqobatlashdi:
- “Odilbekov Og‘abek” oilaviy korxonasi;
- “Fayzullahon Biznes Invest“ MChJ.
Komissiya a’zolarining yakuniy baholariga ko‘ra, tenderni 91 ball bilan “F.B.I.” korxonasi yutgan. Shartnoma summasi 104 million 580 ming so‘m. Ya’ni g‘olib boshlang‘ich narxdan 20 ming so‘m kamroq taklif qilgan.
.jpg)
Tender ishtirokchilarining rahbariyati bilan tanishish jarayonida shubhali holatga duch keldik. Statistika agentligiga ko‘ra, “F.B.I.” MChJning rahbari Norqobilov Odilbek Sanginboyevich hisoblanadi.
.jpg)
E’tiborlisi shundaki, tenderda unga “raqobatchilik“ qilgan “Odilbekov Og‘abek” oilaviy korxonasining ta’sischilaridan biri ham aynan Norqobilov Odilbek Sanginboyevich.
“Davlat xaridlari to‘g‘risida”gi qonunning 68-moddasiga ko‘ra, tender ishtirokchisi faqat bitta taklif berishga haqli.
Mas’ullardan ushbu shubhali tender natijalariga e’tibor qaratib, noqonuniy holatlar yuzasidan chora ko‘rishni so‘raymiz.
Izoh (0)