Sog‘liqni saqlash vazirligi O‘zbekistonda 60 yoshdan oshganlarga xavfli dorilar tarqatilayotganini rad etdi. Bu haqda vazirlik axborot xizmati xabar berdi.
Ma’lum qilinishicha, ijtimoiy tarmoqlarda O‘zbekiston Xitoydan katta miqdorda dori vositalari sotib olgani, tabletka ko‘rinishidagi ushbu preparatlar mamlakat bo‘ylab 60 yoshdan oshgan aholi vakillariga berilishi, ammo ular inson organizmi uchun xavfli ekani haqida xabarlar tarqalgan.
“Bundan 2 yil avval yurtimizda koronavirus pandemiyasi ayni avj olgan og‘ir va murakkab davrda ham internet tarmoqlarida COVID-19 infeksiyasiga qarshi ishlab chiqarilgan vaksinalar to‘g‘risida shu singari haqiqatga zid ma’lumotlar tarqatilgan edi.
Biroq oradan vaqt o‘tib, ushbu xabarlar mutlaqo uydirma ekani ma’lum bo‘ldi. Aksincha, vaksinalar aholi o‘rtasida koronavirus infeksiyasiga qarshi ommaviy immunitetni shakllantirish, kasallikning oldini olish hamda pandemiyani to‘xtatishda muhim vosita bo‘lib xizmat qildi.
Shu ma’noda aytsak, odamlar orasida turli vahima va xavotir uyg‘otish maqsadida tarqatilayotgan bu galgi xabarlar ham bo‘xton va safsatadan boshqa narsa emas”, — deyiladi Sog‘liqni saqlash vazirligi matbuot kotibi tomonidan e’lon qilingan xabarda.
Izoh (0)