17-may kuni Xitoy Xalq Respublikasining Sian shahrida O‘zbekiston—Xitoy biznes-forumi bo‘lib o‘tdi. Unda Xitoyning 400 dan ortiq yirik kompaniyalari vakillari ishtirok etdi. Forum davomida qator kelishuvlar va shartnomalar imzolandi. Shu bilan birga, turli sohalarda muhokamalar ham o‘tkazildi.
BGI Genomics kompaniyasi bosh direktori Jun Cheng tadbirda erishilgan kelishuvlar yuzasidan intervyu berdi. Uning so‘zlariga ko‘ra, o‘tgan yilning noyabr oyida Toshkentda homiladorlar va yangi tug‘ilgan chaqaloqlarga tibbiy xizmat ko‘rsatadigan kompaniya tashkil qilingan va u bu borada tegishli vazirliklardan qo‘llov kutmoqda.
“Men BGI Genomics kompaniyasining MDH hududi bo‘yicha direktoriman. Bizning kompaniya genetik test bo‘yicha dunyodagi yetakchi kompaniya hisoblanadi.
O‘tgan yil noyabr oyida biz Toshkentda hamkorlikda homiladorlar va yangi tug‘ilgan chaqaloqlarga tibbiy xizmat ko‘rsatadigan kompaniya tashkil qildik. Umid qilamanki, O‘zbekistonning tegishli vazirliklaridan bu borada qo‘llov olamiz. Biz O‘zbekistonda onalik va bolalikni himoya qilish, sog‘liqni saqlash tizimini yaxshilash borasida samarali chora-tadbirlarni amalga oshira olishimizga ishonchimiz komil.
Biz Markaziy Osiyo davlatlari bilan avvaldan hamkorlik qilib kelamiz. Masalan, 2020-yilda Qozog‘istonga PZR testlari yetkazib bergandik. Bugunga kelib pandemiya tugadi, ammo o‘shanda o‘rnatilgan hamkorlik birgalikda boshqa loyihalarni amalga oshirishga ko‘mak berdi.
O‘zbekistonda ham hamkorlik ko‘lamini kengaytirib bormoqdamiz. Masalan, biz Sirdaryodagi skrining markazi faoliyati bilan yaqindan tanishdik. U yerdagi eskirgan tibbiy uskunalarni yangilariga almashtirish bo‘yicha o‘zaro hamkorlik rejalari tuzganmiz”, — dedi Cheng.
Izoh (0)