Markaziy bank nomidan kanal ochib, fuqarolarga onlayn kredit taklif etilayotgani aniqlandi

Markaziy bank nomidan Telegram’da kanal ochib, fuqarolarga onlayn kredit taklif etilayotgani aniqlandi. Bu haqda bank axborot xizmati xabar berdi.

Qayd etilishicha, hozirda firibgarlarning internet tarmog‘idan soxta telefon raqamlari orqali fuqarolarga qo‘ng‘iroq qilish holatlari kuzatilmoqda. Bunda firibgarlar Markaziy bank xodimi sifatida o‘zini tanishtirib, fuqarolarning ishonchiga kirishga urinmoqda. 

Bundan tashqari, firibgarlar Telegram’da Markaziy bank nomidan ochilgan “Markaziy_Banki_uz” soxta kanalida fuqarolarga onlayn kreditlar taklif etib, ularning bank kartalariga oid ma’lumotlarini qo‘lga kiritish orqali bank kartasidagi pul mablag‘larini o‘zlashtirish holatlari kuzatilmoqda. Markaziy bank bu kabi xabar va foydalanuvchiga hech qanday aloqasi yo‘qligini ma’lum qildi.

Markaziy bank fuqarolarga quyidagi ma’lumotlarni eslatib o‘tgan:

• Markaziy bank jismoniy shaxslarga kreditlar ajratmaydi va moliyaviy xizmatlar ko‘rsatish bilan shug‘ullanmaydi;
• Fuqarolardan ushbu xabarlarga e’tibor qaratmaslik va bank kartalari ma’lumotlarini uchinchi shaxslarga bermaslik, hech qanday havolaga kirmaslik so‘raladi; 
• Ijtimoiy tarmoqlardan foydalanish jarayonida regulyatorning tarmoqlardagi verifikasiyalangan sahifalaridan foydalanish tavsiya etiladi.