Марказий банк номидан канал очиб, фуқароларга онлайн кредит таклиф этилаётгани аниқланди

Марказий банк номидан Telegram’да канал очиб, фуқароларга онлайн кредит таклиф этилаётгани аниқланди. Бу ҳақда банк ахборот хизмати хабар берди.

Қайд этилишича, ҳозирда фирибгарларнинг интернет тармоғидан сохта телефон рақамлари орқали фуқароларга қўнғироқ қилиш ҳолатлари кузатилмоқда. Бунда фирибгарлар Марказий банк ходими сифатида ўзини таништириб, фуқароларнинг ишончига киришга уринмоқда. 

Бундан ташқари, фирибгарлар Telegram’да Марказий банк номидан очилган “Марказий_Банки_уз” сохта каналида фуқароларга онлайн кредитлар таклиф этиб, уларнинг банк карталарига оид маълумотларини қўлга киритиш орқали банк картасидаги пул маблағларини ўзлаштириш ҳолатлари кузатилмоқда. Марказий банк бу каби хабар ва фойдаланувчига ҳеч қандай алоқаси йўқлигини маълум қилди.

Марказий банк фуқароларга қуйидаги маълумотларни эслатиб ўтган:

• Марказий банк жисмоний шахсларга кредитлар ажратмайди ва молиявий хизматлар кўрсатиш билан шуғулланмайди;
• Фуқаролардан ушбу хабарларга эътибор қаратмаслик ва банк карталари маълумотларини учинчи шахсларга бермаслик, ҳеч қандай ҳаволага кирмаслик сўралади; 
• Ижтимоий тармоқлардан фойдаланиш жараёнида регуляторнинг тармоқлардаги верификасияланган саҳифаларидан фойдаланиш тавсия этилади.