Xitoy Xalq Respublikasining qadimiy poytaxti Sian shahrida 17-may kuni O‘zbekiston – Xitoy biznes-forumi bo‘lib o‘tdi. Unda mamlakatimizning uzoq muddatli hamkorlaridan tashqari, O‘zbekiston bilan hamkorlikni yo‘lga qo‘yishdan manfaatdor Xitoyning 400 dan ortiq yirik kompaniyalari ham ishtirok etdi.
Xitoy ishbilarmon doiralari vakillari O‘zbekistonda ijobiy tarkibiy o‘zgarishlar va biznes yuritish uchun yaratilgan qulay sharoitlar bilan atroflicha tanishtirildi.
O‘zbekiston transport vaziri forum yakunlari bo‘yicha fikrlarini bildirar ekan, Xitoy bilan hamkorlikni o‘zbekistonliklar allaqachon sezishni boshlaganini aytdi.
“Respublikamizda qurilayotgan kamida ikkita yirik magistral yo‘llarimizda Xitoy kompaniyalari ishtirok etishgan. Bundan tashqari, temir yo‘l sohasida poyezd vagonlarini ishlab chiqarish bo‘yicha ham muhokamalar bo‘lmoqda. Bugungi kunda yuk vagonlariga ehtiyojimiz mavjud. Yuk aylanmasi oshgani sayin, vagonlarga ehtiyoj bo‘lgani uchun Xitoyning yirik kompaniyasi bilan O‘zbekistonda qo‘shma korxona qilib, yuk vagonlarini ishlab chiqarish bo‘yicha shartnoma imzoladik”, — deydi u.
“BGI Genomics” kompaniyasi bosh direktori Jun Chengning so‘zlariga ko‘ra, kompaniya Sirdaryodagi skrining markazi faoliyati bilan yaqindan tanishgan.
“U yerdagi eskirgan tibbiy uskunalarni yangilariga almashtirish bo‘yicha o‘zaro hamkorlik rejalari tuzganmiz”, — deydi mutaxassis.
Tadbir yakunida energetika, kimyo, metallurgiya, yengil sanoat, geologiya, transport, qishloq xo‘jaligi, taʼlim, fan, raqamli texnologiyalar, avtomobilsozlik, elektrotexnika, farmasevtika, turizm va boshqa sohalarda 20 ga yaqin ikki tomonlama hujjatlar imzolandi.
“Daryo” mazkur forumdan reportaj tayyorladi.
Izoh (0)