17-may kuni Xitoy Xalq Respublikasining Sian shahrida O‘zbekiston – Xitoy biznes-forumi bo‘lib o‘tdi. Unda Xitoyning 400 dan ortiq yirik kompaniyalari vakillari ishtirok etdi. Forum davomida qator kelishuvlar va shartnomalar imzolandi. Shu bilan birga turli sohalarda muhokamalar ham o‘tkazildi.
O‘zbekiston transport vaziri Ilhom Mahkamov forumda erishilgan kelishuvlar xususida intervyu berdi.
— O‘zbekiston — Qirg‘iziston — Xitoy temiryo‘l loyihasi haqida gapirsangiz...
— Bugungi kunda Xitoy dunyodagi eng yirik tovar ishlab chiqaruvchiga aylangan. Dunyoning ko‘plab mamlakatlariga Xitoy o‘z mahsulotlarini eksport import qiladi.
Bu jihatda O‘zbekistonning eng asosiy ro‘lini kuchaytirish maqsadida O‘zbekiston orqali Xitoyga kelayotgan mahsulotlarga mamlakatimiz tranzit, yaʼni ko‘prik bo‘lib berishi asosiy maqsad. Hozirda Xitoyning qator transport logistika kompaniyalari bilan shartnomalarni imzolayapmiz. Bu kompaniyalar nafaqat O‘zbekiston orqali mahsulotlarini ayirboshlash yoki transport xizmatlarini respublikamiz orqali ko‘rsatadi, balki qo‘shma korxonalar tuzib, O‘zbekiston Respublikasi hududida logistika markazlarini yaratadi. Bu chegaraoldi logistika markazlari bo‘ladi.
“O‘zbekiston temir yo‘llari”ning Xitoydagi qator tashkilotlar bilan qo‘shma korxonasi tuzilib, logistika markazlaridan tashqari, konteynerlashtiriladigan tashuvlarni amalga oshiradi. Qirg‘iziston orqali yuk aylanmasini amalga oshirishdan asosiy maqsad hozir yirik loyihaning ustida turibmiz. Mana bugun Xitoy temir yo‘llari qoshidagi birinchi loyiha instituti bilan biz texnik iqtisodiy asoslarni yakunladik. Bugun xitoylik va qirg‘iz hamkasblarimiz bilan keyingi qadamlarga qanday o‘tish bo‘yicha alohida “yo‘l xarita”lariga qo‘l qo‘yamiz.
Xitoyda transport tizimi juda yaxshi rivojlangan. Shu jihatdan temir yo‘l, avtomobil yo‘llari qurilishida Xitoy kompaniyalarini O‘zbekistonga jalb qilish va O‘zbekistonda mavjud loyihalarda ularni tenderlarda ishtirok etish bo‘yicha muhokamalar olib borilmoqda.
— Bugungi kelishuvlar va natijalarni o‘zbekistonliklar o‘z hayotlarida qachondan sezishni boshlaydi?
— Men o‘ylaymanki, Xitoy bilan hamkorlikni hamyurtlarimiz allaqachon sezishni boshlashgan. Respublikamizda qurilayotgan kamida ikkita yirik magistral yo‘llarimizda Xitoy kompaniyalari ishtirok etishgan.
Bundan tashqari, temir yo‘l sohasida poyezd vagonlarini ishlab chiqarish bo‘yicha ham muhokamalar bo‘lmoqda. Bugungi kunda yuk vagonlariga ehtiyojimiz mavjud. Yuk aylanmasi oshgani sayin, vagonlarga ehtiyoj bo‘lgani uchun Xitoyning yirik kompaniyasi bilan O‘zbekistonda qo‘shma korxona qilib, yuk vagonlarini ishlab chiqarish bo‘yicha shartnoma imzoladik.
— Joriy yilning o‘zida poytaxtga 1000 ta avtobus olib kelinishi reja qilingan. Umuman olganda Xitoy elekromobil sohasida yaxshi rivojlangan. Bu soha bo‘yicha ham kelishuvlarga erishilmoqdami?
— Haqiqatanam Toshkent shahriga 1000 ta avtobus olib kelinishi bo‘yicha kelishuvimiz bor. Bugungi kunda poytaxtga 600 ta avtobus keltirildi, qolgan 400 tasi ham may oyi oxirigacha yetib keladi.
Bundan tashqari, biz viloyat markazlariga ham avtobuslarni xarid qilishimiz lozim. Shu bois ham Xitoyning yirik kompaniyalari bilan ushbu mahsulotni ishlab chiqarishni davom ettirishni kelishyapmiz. Eng asosiysi, dillerlar orqali emas, “ikkinchi qo‘l” orqali emas, balki to‘g‘ridan-to‘g‘ri sotish bo‘yicha kelishuvlar amalga oshirilmoqda. To‘g‘ridan-to‘g‘ri degani o‘z narxida sotish.
Bundan tashqari, “Yutong” kompaniyasi avtobuslarini O‘zbekistonda ishlab chiqarish bo‘yicha kelishuvlar bo‘lmoqda.
— Qaysi hududlarga shunday avtobuslar yetkazilishi reja qilingan?
— Dastlabkisi, bugungi kunda Samarqanddagi YETTBning sammitida 6 ta avtobusning taqdimoti bo‘lib o‘tdi. Bular 2 oy ichida yana 100 ta olinadi, Nukus shahriga yana 100 ta olinadi.
Izoh (0)