Belarusdagi muxolifat kuchlari mamlakat prezidenti Aleksandr Lukashenkoda og‘ir virusli infeksiya qayd etilganini ilgari surdi. Bu haqda Euroradio xabar berdi.
Maʼlum qilinishicha, Belarus prezidentida yuqumli-allergik miokardit aniqlangan bo‘lishi mumkin.
“Inqirozga qarshi xalq boshqarmasiga kelib tushgan baʼzi maʼlumotlarga ko‘ra, Lukashenkoda yuqumli-allergik miokardit bor”, — dedi hokimiyat tranziti bo‘yicha Vazirlar mahkamasi vakili Pavel Latushko.
Belarus demokratik kuchlari yetakchisi Svetlana Tixanovskaya ham Lukashenkoning sog‘lig‘idagi o‘zgarishlarga munosabat bildirdi.
“Biz har bir ssenariyga puxta tayyorgarlik ko‘rishimiz kerak, Belarusni demokratiya yo‘liga qaytarib, Rossiya aralashuvining oldini olish kerak”, — dedi u.
Infeksion-allergik miokardit — infeksiya natijasida kelib chiqqan yurak mushaklarining yallig‘lanish kasalligi. Ushbu kasallikning belgilari nafas qisilishi, charchoq, yurakning tez urishi, ko‘krak qafasida va bo‘g‘imda og‘riqni o‘z ichiga olishi mumkin.
Eslatib o‘tamiz, 15-may kuni Rossiya prezidenti matbuot kotibi Dmitriy Peskov Belarus prezidenti Aleksandr Lukashenkoning sog‘lig‘i haqidagi mish-mishlarga izoh berib, Belarus rahbarining sog‘lig‘i bilan bog‘liq muammolar haqida Kremlda hech qanday maʼlumot yo‘qligini aytgandi.
14-may kuni Belarusda rasmiy davlat ramzlari kuni nishonlandi va Lukashenko yana omma oldiga chiqmadi. Prezidentning tabriknomasi Belarus prezidentining veb-saytida eʼlon qilingan, biroq uni tantanali marosimda bosh vazir Roman Golovchenko o‘qib bergan.
O‘sha kuni Belarus rahbari matbuot xizmatining norasmiy maʼlumotlariga ko‘ra, prezident omma oldiga chiqmayotganiga uning “tig‘iz ish jadvali” va “hujjatlar bilan ishlashi” sabab bo‘lgan.
Izoh (0)