Беларусдаги мухолифат кучлари мамлакат президенти Александр Лукашенкода оғир вирусли инфекция қайд этилганини илгари сурди. Бу ҳақда Euroradio хабар берди.
Маълум қилинишича, Беларусь президентида юқумли-аллергик миокардит аниқланган бўлиши мумкин.
“Инқирозга қарши халқ бошқармасига келиб тушган баъзи маълумотларга кўра, Лукашенкода юқумли-аллергик миокардит бор”, — деди ҳокимият транзити бўйича Вазирлар маҳкамаси вакили Павел Латушко.
Беларусь демократик кучлари етакчиси Светлана Тихановская ҳам Лукашенконинг соғлиғидаги ўзгаришларга муносабат билдирди.
“Биз ҳар бир сценарийга пухта тайёргарлик кўришимиз керак, Беларусни демократия йўлига қайтариб, Россия аралашувининг олдини олиш керак”, — деди у.
Инфексион-аллергик миокардит — инфекция натижасида келиб чиққан юрак мушакларининг яллиғланиш касаллиги. Ушбу касалликнинг белгилари нафас қисилиши, чарчоқ, юракнинг тез уриши, кўкрак қафасида ва бўғимда оғриқни ўз ичига олиши мумкин.
Эслатиб ўтамиз, 15 май куни Россия президенти матбуот котиби Дмитрий Песков Беларусь президенти Александр Лукашенконинг соғлиғи ҳақидаги миш-мишларга изоҳ бериб, Беларусь раҳбарининг соғлиғи билан боғлиқ муаммолар ҳақида Кремлда ҳеч қандай маълумот йўқлигини айтганди.
14 май куни Беларусда расмий давлат рамзлари куни нишонланди ва Лукашенко яна омма олдига чиқмади. Президентнинг табрикномаси Беларусь президентининг веб-сайтида эълон қилинган, бироқ уни тантанали маросимда бош вазир Роман Головченко ўқиб берган.
Ўша куни Беларусь раҳбари матбуот хизматининг норасмий маълумотларига кўра, президент омма олдига чиқмаётганига унинг “тиғиз иш жадвали” ва “ҳужжатлар билан ишлаши” сабаб бўлган.
Изоҳ (0)