Belarus prezidenti Aleksandr Lukashenko 9-maydan keyin omma oldida ko‘rinmadi. Moskvadagi harbiy paradda ko‘pchilik Lukashenkoning qo‘lidagi bintga va uning salomatligidagi o‘zgarishlarga e’tibor qaratdi. Omma oldida qanchalik ko‘p ko‘rinmasa, Lukashenkoning qayerdaligi haqida shunchalik ko‘proq savollar tug‘iladi.
“Zerkalo” nashri jurnalisti oddiy fuqaro niqobi ostida Belarus prezidenti matbuot xizmatiga qo‘ng‘iroq qilib, uning qayerdaligi haqida so‘radi.
Belarus prezidenti administratsiyasiga ko‘ra, hozirda odatda faol bo‘lgan Lukashenko uchun uchrashuvlar va sayohatlar jadvali yo‘qligiga qaramay, uning ish garafigi tig‘iz. Siyosatchi “hujjatlar bilan ishlashi” qayd etilgan.
Odatda siyosatchining barcha xatti-harakatlarini batafsil yoritib turuvchi “PUL Pervogo” Telegram kanalida yaqinda Mustaqillik saroyi yonida quyon aks etgan kadrning chop etilishi yoki savdo-sotiq reklamalari nima sababdan paydo bo‘lgani so‘ralgan. Belarus prezidenti matbuot xizmati “PUL Pervogo” anonim ekani va prezident matbuot xizmatining unga aloqasi yo‘qligini bildirgan.
Jurnalist ham, boshqa belarusliklar ham Lukashenkoni jamoat joylarida qachon ko‘rishi mumkinligi, uning sog‘lig‘i qandayligi haqidagi savolga javob ololmagan. Siyosatchining spikerlari ham, uning ma’muriyati ham hech qanday tafsilotni oshkor etmayapti, faqat u bilan “hammasi yaxshi” ekani, “mish-mishlarga ishonmaslik” kerakligi ta’kidlangan.
Aleksandr Lukashenkoning salomatligi haqidagi savollar u Moskvadagi paradda 300 metr piyoda yura olmaganidan keyin paydo bo‘ldi. Rossiya prezidenti Vladimir Putinning qo‘riqchilari uni mashinada olib yurishga majbur bo‘ldi.
Bundan tashqari, Moskvada Lukashenkoning qo‘li bint bilan o‘ralgani aniqlandi, MDH davlatlari yetakchilari uchun tashkillashtirilgan tushlikda ham ishtirok etmadi va Minskka qaytib ketdi. Kechqurun Minskda siyosatchi G‘alaba haykali poyiga gulchambar qo‘yish marosimida o‘zining an’anaviy nutqini qilmadi.
Izoh (0)