Belarus prezidenti Aleksandr Lukashenko 9-may kuni Moskvadagi paradda zaharlangan bo‘lishi mumkinligi haqida mish-mishlar tarqaldi. Bu haqda The Mirror xabar berdi.
Lukashenko 9-mayda Rossiya prezidentining MDH davlatlari yetakchilari uchun tashkillashtirilgan tushlikda ishtirok etmagani e’tiborga olingan. Belarus prezidenti boshqa rahbarlardan farqli o‘laroq, Aleksandr bog‘idagi noma’lum askar qabriga mashinada borgan. U qabr poyiga gul qo‘yishga ham qiynalgan.
Belaruslik siyosatshunos Dmitriy Bolkunets Lukashenko zaharlangan bo‘lishi mumkinligini ilgari surmoqda. Jurnalistlar Lukashenko Putindan Aleksandr bog‘iga MDH yetakchilari bilan piyoda emas, balki mashinada ketishni so‘ragani aks etgan tasvirlarga e’tibor qaratdi.
Belarus prezidenti Rossiya xavfsizlik xizmati xodimidan uni noma’lum askarning qabriga olib borishni so‘ragan bo‘lishi mumkin. Qizil maydondan bog‘gacha taxminan 850 metrni tashkil qiladi.
Nashrning qayd etishicha, Putin va boshqa yetakchilar Lukashenkoni kutgan, keyin birga gul qo‘yishga borishgan.
“Belarus rahbari tashqi ko‘rinishidan sog‘lom ko‘rinadigan 70 yoshli Kreml rahbarining yonida biroz o‘zini noqulay tutdi. Aftidan, unga boshqa rahbarlar bilan birga egilib, noma’lum askar qabriga gul qo‘yish qiyin bo‘lgan”, — deyiladi xabarda.
Shundan so‘ng Lukashenko Putin tashkillashtirgan norasmiy tushlikni o‘tkazib yuborgan va tez yordam mashinasi hamrohligida Minskka qaytish uchun aeroportga yo‘l olgan.
Bundan tashqari, jurnalistlar Belarus prezidentining o‘ng qo‘liga bint bog‘langaniga e’tibor qaratgan.
Kremlning Lukashneko tushlikka kelmaganiga munosabati
Rossiya prezidenti matbuot kotibi Dmitriy Peskovga ko‘ra, Lukashenko Minskda G‘alaba kuni bilan bog‘liq tadbirlar sababli imkon qadar tezroq ketishga majbur bo‘lgan. Peskov Belarus prezidentining salomatligi haqidagi savolga javob bermagan.
“Aleksandr Grigorevichning sog‘lig‘i haqida nimadir deyishim o‘ta noto‘g‘ri bo‘ladi”, — degan u.
Lukashenkoning matbuot xizmati siyosatchining Moskvadan shoshilinch ravishda chiqib ketishiga izoh bermagan.
Izoh (0)