Namangan viloyati Davlatobod tumanida pul evaziga haydovchilik guvohnomasini olish uchun topshiriladigan imtihondan o‘tkazib qo‘yishni va’da qilgan shaxs qo‘lga olindi. Bu haqda viloyat IIB axborot xizmati xabar berdi.
Qayd etilishicha, 8-may kuni Pop tumanida yashovchi 44 yoshli ayol IIV SHXBB Namangan viloyati bo‘yicha boshqarmasiga ariza bilan murojaat qilib, mart oyida 21 yoshli o‘g‘li haydovchilik guvohnomasini olish uchun Davlatobod tumanida joylashgan viloyat IIB YHXBga qarashli imtihon topshirish bo‘limiga kelgan vaqtida, YHXB avtoturargohida o‘zini “Dildora” deb tanishtirgan shaxs unga pul evaziga imtihondan o‘tishiga yordam berishini aytganini ma’lum qilgan. Ayolga ko‘ra, ushbu shaxs 100 AQSH dollari miqdoridagi pullarni olgan, lekin o‘g‘li imtihondan o‘ta olmagan.
Mazkur holat bo‘yicha shu kuni soat 13:00 larda, IIV SHXBB Namangan viloyati bo‘yicha boshqarmasi xodimlari tomonidan tezkor tadbir o‘tkazilgan. Tadbir davomida Namangan shahrida yashovchi 37 yoshli ayol Davlatobod tumani hududida joylashgan tamaddixonada arizachidan olingan hujjatlarni qaytarib berayotgan vaqtida ushlangan.
Ushbu holat yuzasidan shahar IIO FMB huzuridagi Tergov bo‘limi tomonidan Jinoyat kodeksining 168-moddasi (firibgarlik) 1-qismi bilan jinoyat ishi qo‘zg‘atilgan.
Aprel oxirlarida Toshkent viloyatida soxta sertifikat evaziga haydovchilik guvohnomasi olgan fuqaroga sud hukmi o‘qilgandi. Unga Jinoyat kodeksining 59-moddasiga asosan tayinlangan jazolarni qisman qo‘shish yo‘li bilan uzil-kesil o‘tash uchun ish haqining 20 foizini davlat daromadi hisobiga ushlab qolgan holda 2,5 yil muddatga axloq tuzatish ishlari jazosi tayinlangan.
Izoh (0)