O‘zbekiston hududining katta qismi hafta davomida Kavkaz hududlari ustida shakllangan yuqori siklon taʼsiri ostida bo‘ladi. Bu haqda “O‘zgidromet” xabar berdi.
Maʼlum qilinishicha, 15-may kuni respublika bo‘yicha quruq va ochiq ob-havo saqlanib turadi, faqat Qoraqalpog‘iston Respublikasi va Xorazm viloyatida vaqti-vaqti bilan yomg‘ir yog‘adi, baʼzi joylarda kuchli bo‘ladi, momaqaldiroq bo‘lishi mumkin. Havo harorati kunduzi 33-35 darajani tashkil etadi.
Ish haftasining qolgan kunlarida respublika bo‘yicha vaqti-vaqti bilan yomg‘ir yog‘adi, momaqaldiroq bo‘ladi, 16-mayda Qoraqalpog‘iston Respublikasi va Xorazm viloyatida, 17-mayda Buxoro, Navoiy, Toshkent, Samarqand, Jizzax, Qashqadaryo viloyatlarida yomg‘ir kuchli yog‘ishi, ayrim joylarda do‘lga aylanishi mumkin.
Harorat foni:
- 16-may kechasi 18-20 darajani, kunduzi 31-33 darajani tashkil etadi;
- 17-may kuni kechasi 13-18 daraja bo‘ladi, kunduzi 17-22 darajagacha pasayadi;
- 18-may kuni kechasi 10-15 daraja bo‘ladi, kunduzi 20-25 darajagacha biroz ko‘tariladi;
- 19-may kuni kechasi 12-17 darajani tashkil etadi, kunduzi 25-30 darajagacha yana biroz ko‘tariladi.
15-16-may kunlari shimolda va cho‘l hududlarda, 17-mayda respublika bo‘yicha baʼzi joylarda shamol tezligi 15-20 metr/soniyagacha kuchayishi kutilmoqda, baʼzida 23-25 metr/soniyagacha kuchayishi, ayrim joylarda chang-to‘zonlar bilan kuzatilishi mumkin.
Respublikaning tog‘oldi va tog‘li hududlarida vaqti-vaqti bilan yomg‘ir yog‘adi, momaqaldiroq bo‘lishi mumkin, 17-19-may kunlari baʼzi joylarda kuchli bo‘ladi. Baland tog‘larda (2 000 metrdan yuqorida) 17-19-may kunlari yomg‘ir qorga aylanishi mumkin.
Toshkent shahrida 15-16-may kunlari yog‘ingarchilik kutilmaydi, 17-18-may kunlari vaqti-vaqti bilan yomg‘ir yog‘adi, momaqaldiroq bo‘ladi. Shamol yo‘nalishi birozdan o‘rtachagacha o‘zgarib turadi, chorshanba kuni 12-15 metr/soniyagacha kuchayishi mumkin.
Bundan oldin “O‘zgidromet” O‘zbekiston hududiga 14—17-may kunlari Kaspiy dengizining janubiy hududlaridan nam havo, so‘ngra Volga bo‘yi hududlaridan salqin havo kirib kelishi kutilayotganini ma’lum qilgandi.
Izoh (0)