Shavkat Mirziyoyev 15-may kuni Turkiya prezidenti Rajab Toyyib Erdo‘g‘on bilan telefon orqali muloqot qildi. Bu haqda Prezident matbuot xizmati xabar berdi.
Qayd etilishicha, davlat rahbari Turkiya yetakchisini mamlakatda prezidentlik va parlament saylovlari muvaffaqiyatli o‘tkazilgani bilan samimiy qutlagan. Ularning yakunlariga ko‘ra, saylovchilarning ko‘pchiligi amaldagi prezident va respublika alyansiga ovoz bergan.
Ovoz berish natijalari qardosh Turkiya xalqi prezident Rajab Toyyib Erdo‘g‘on rahbarligida amalga oshirilayotgan siyosiy yangilanishlar va iqtisodiy islohotlarni keng qo‘llab-quvvatlayotganidan dalolat ekani alohida taʼkidlangan.
“Suhbatda O‘zbekiston bilan Turkiya o‘rtasidagi keng qamrovli strategik sheriklik va ko‘p qirrali hamkorlik munosabatlarini yanada mustahkamlashning dolzarb masalalari ko‘rib chiqildi”, — deyiladi xabarda.
Oliy darajadagi Strategik hamkorlik kengashining navbatdagi yig‘ilishida kun tartibini tayyorlash bo‘yicha faol ishlarni davom ettirish muhimligi qayd etilgan.
TRT davlat telekanali ma’lumotlariga ko‘ra, Turkiyada 100 foiz byulletenlar hisoblab chiqilgan. Unga ko‘ra, Rajab Toyyib Erdo‘g‘on 49,24 foiz, Kamol Qilichdaro‘g‘li esa 45 foiz ovoz to‘plagan.
Izoh (1)
ХАММАСИ РЕЖАДАГИДЕК