Amerikaga borib yashamoqchi bo‘lganlar qanday sinovlarga duch keladi? AQSHda bir oy yashash uchun minimal hisobda qancha mablag‘ kerak? 2001-yildan buyon Qo‘shma shtatlarda istiqomat qilayotgan jurnalist, “Amerika ovozi” teleradiosi muxbiri Navbahor Imomova ushbu savollarga javob berdi.
Navbahor Imomovaning aytishicha, Amerikada yashash xarajatlari yuqori, ayniqsa, oilaviy hayot kechirish ancha qimmatga tushadi.
“Vashington, Nyu York yoki boshqa qimmat shaharlarda har kuni ovqatlana olishingiz, o‘zingizga qarashingiz uchun oyiga 1 500 dollardan 2 000 dollargacha pul kerak. Va bu bilan siz kambag‘al hisoblanasiz. Lekin oilangiz bo‘lsa, buncha pul bilan yashash ilojsiz. Amerikaning aksariyat hududlarida siz ikki farzandingiz bilan bir xonali uyda yashay olmaysiz. Chunki bu noqonuniy hisoblanadi. Vashington yoki unga qo‘shni Baltimor shahrida ikki farzandingiz va o‘zingiz uchun ijaraga uy olmoqchi bo‘lsangiz, uni eng arzoni, agar omadingiz chopsa, 1 500—2 000 dollarga topishingiz mumkin. Lekin gap ancha xarob ahvoldagi kvartira haqida ketmoqda. Yashash uchun osonroq, qulayliklari bor joylar oyiga 3 000—3 500 dollargacha boradi. To‘rt aʼzolik oilaga haftasiga yegulik uchun 400—600 dollargacha sarflashga majbur bo‘lasiz”, — deydi jurnalist.
Navbahor Imomovaning aytishicha, AQSHga yangi borganlar yiliga 40-50 ming dollar atrofida pul topishi mumkin. Ammo bu nisbiy hisob bo‘lib, qanday natijalarga erishish insonning harakati va salohiyatiga bog‘liq.
“Amerikaga bormoqchi bo‘lganlar ko‘plab sinovlarga tayyor bo‘lishlari kerak. Muhojirlik sinovlariga, o‘zga yurtda hayotni noldan boshlashga o‘zingizda kuch topa olishingiz kerak. AQSHga kelganingizda cho‘ntagingizda ozgina bo‘lsa ham pulingiz bo‘lsin. Chunki bu yerda hech kimdan qarz so‘ray olmaysiz, qarz beradiganlarni ham topish qiyin. Albatta, kelib, bank hisobi ochish mumkin. Bank xizmatlaridan foydalana olasiz. Lekin u yerdan kredit olish uchun ham o‘ziga xos moliyaviy tarix kerak. Men Amerikada turli yoshdagilarni ko‘rdim. Nafaqaga chiqib, bu yerga kelib, hayotini noldan boshlab, yangi kasb o‘rganib, tilni ham eplab, yangi bir turmush boshlaganlar bilan ham tanishman. Shu bilan birga, yosh bo‘la turib, yo‘lini topa olmay, yana O‘zbekistonga qaytib ketganlar ham bor. Agar insonda kuchli iroda va xohish, tirishqoqlik, sabr hamda mehnatkashlik bo‘lsa, yo‘lini topib ketish ehtimoli nihoyatda katta. Agar siz O‘zbekistonda ham ishini biladigan, o‘qigan, hunarli bo‘lsangiz, bu yerga ham moslashib ketishingiz oson kechadi. Hunarli odam Amerikada ham ko‘chada qolmaydi. Ingliz tilida hech bo‘lmaganda oddiy, oz bo‘lsa-da muloqot qila olasizmi, sizga ish topiladi”, — deydi “Amerika ovozi” muxbiri.
Avvalroq saytimizda Navbahor Imomova bilan Green Card, Amerikada yashash va ishlashning o‘ziga xos jihatlari haqida suhbat e’lon qilingan.
Izoh (0)