Наманган вилояти Давлатобод туманида пул эвазига ҳайдовчилик гувоҳномасини олиш учун топшириладиган имтиҳондан ўтказиб қўйишни ваъда қилган шахс қўлга олинди. Бу ҳақда вилоят ИИБ ахборот хизмати хабар берди.
Қайд этилишича, 8 май куни Поп туманида яшовчи 44 ёшли аёл ИИВ ШХББ Наманган вилояти бўйича бошқармасига ариза билан мурожаат қилиб, март ойида 21 ёшли ўғли ҳайдовчилик гувоҳномасини олиш учун Давлатобод туманида жойлашган вилоят ИИБ ЙҲХБга қарашли имтиҳон топшириш бўлимига келган вақтида, ЙҲХБ автотураргоҳида ўзини “Дилдора” деб таништирган шахс унга пул эвазига имтиҳондан ўтишига ёрдам беришини айтганини маълум қилган. Аёлга кўра, ушбу шахс 100 АҚШ доллари миқдоридаги пулларни олган, лекин ўғли имтиҳондан ўта олмаган.
Мазкур ҳолат бўйича шу куни соат 13:00 ларда, ИИВ ШХББ Наманган вилояти бўйича бошқармаси ходимлари томонидан тезкор тадбир ўтказилган. Тадбир давомида Наманган шаҳрида яшовчи 37 ёшли аёл Давлатобод тумани ҳудудида жойлашган тамаддихонада аризачидан олинган ҳужжатларни қайтариб бераётган вақтида ушланган.
Ушбу ҳолат юзасидан шаҳар ИИО ФМБ ҳузуридаги Тергов бўлими томонидан Жиноят кодексининг 168-моддаси (фирибгарлик) 1-қисми билан жиноят иши қўзғатилган.
Апрель охирларида Тошкент вилоятида сохта сертификат эвазига ҳайдовчилик гувоҳномаси олган фуқарога суд ҳукми ўқилганди. Унга Жиноят кодексининг 59-моддасига асосан тайинланган жазоларни қисман қўшиш йўли билан узил-кесил ўташ учун иш ҳақининг 20 фоизини давлат даромади ҳисобига ушлаб қолган ҳолда 2,5 йил муддатга ахлоқ тузатиш ишлари жазоси тайинланган.
Изоҳ (0)