Франция Украинага ўнлаб зирҳли техника ва енгил танклар, жумладан, AMX-10RC танкларини етказиб беришни ваъда қилмоқда. Бу ҳақда Франция ва Украина президентлари Эммануэл Макрон ва Владимир Зеленскийнинг учрашуви якунлари бўйича қўшма декларацияда маълум қилинди.
Украина президенти сайтида эълон қилинган ҳужжатга кўра, Франция Украинанинг ҳаво ҳужумидан мудофаа тизимини қўллаб-қувватлаш ҳамда Европа Иттифоқи ва НАТОдаги ҳамкорлари билан биргаликда украиналик ҳарбийларни ўқитиш ниятини ҳам билдирган.
Франция Украинага фақат ҳарбий ёрдам билан чекланмайди, дейилади декларацияда. Жумладан, Украинага ДНК таҳлили учун иккита мобил лаборатория кўчириб келинган, бу уруш жиноятларини тергов қилишда ёрдам беради. Келгусида бундай ёрдам кўлами янада ортади, деб қайд этилган ҳужжатда.
Владимир Зеленский 14 май куни Францияга ташриф буюрди. У Париждан аввал Берлинга бориб, у ерда Германия президенти ва канцлери билан музокаралар ўтказган. Зеленскийнинг ташрифи олдидан Германия ҳукумати Украинага қарийб уч миллиард евро миқдоридаги энг йирик ҳарбий ёрдам пакетини эълон қилди. Париждан кейин Зеленский Лондонга йўл олди.
Изоҳ (0)