Belfastdagi Kvins universiteti olimlari insultdan keyin bemorlarni sog‘lomlashtirish uchun miya impulslarini boshqarish orqali ishlaydigan maxsus videoo‘yinlarni ishlab chiqib, sinovdan o‘tkazmoqda, deb xabar berdi BBC. Mutaxassislarning aytishicha, bunday o‘yinlar miyani faolroq ishlashga undaydi va tayanch-harakat motorikasini tiklash jarayonini tezlashtiradi.
Tadqiqot rahbari doktor Keti Rudi izohlashicha, inson bosh miyasi o‘ziga xos neyroplastik o‘zgarish xususiyatiga ega, shu sababli u yangi muhitga tez moslasha oladi va zararlangan qo‘l-oyoqlarning vazifasini bajarish uchun boshqa qismlarni ishga soladi.
“Motorikani rivojlantirish suratlari” miyada real harakatni boshqaradigan hududlarni faollashtiradi. Shu tariqa, haqiqiy harakat qilish hali imkonsiz bo‘lsa ham, tana a’zolarni sog‘lom va faol holatda ushlab turishga yordam beradi, deydi mutaxassis.
Tajriba jarayonida ishtirokchilar boshiga miya faoliyatini o‘qiydigan maxsus garnitura kiyadi. Ular falajlangan tana qismini harakatlantirishni xayolan tasavvur qiladi, miya signallari esa kompyuter o‘yinini boshqarish uchun ishlatiladi. Hozircha bu usul faqat insult oqibatida jiddiy harakat funksiyalarini yo‘qotgan bemorlarda sinalmoqda.
Ko‘ngillilar orasida Dandonald shahridan 67 yoshli sobiq gitarachi Rodni Gamilton ham bor. U 46 yoshida insultga uchrab, qo‘li va panjasini ishlatish qobiliyatidan ayrilgan. Kasallik sababli sevimli mashg‘ulotidan voz kechgan bo‘lsa-da, ushbu yangi tajriba unga tiklanish umidini bergan.
“Eng muhimi, bu jarayon menga zavq bag‘ishlamoqda”, deydi Gamilton.
Olimlar tadqiqot doirasida jami 50 nafar insultdan omon qolgan bemorni jalb qilishni rejalashtirgan. Mutaxassislar kelajakda bunday texnologiyalarni keng joriy etish orqali reabilitatsiya markazlarida davolanish jarayonini sezilarli darajada yaxshilash mumkinligiga umid bildirmoqda.
Izoh (0)